დიდი ბრიტანეთის პრემიერ-მინისტრი ტერეზა მეი ბრექსიტის საკითხზე მეორე რეფერენდუმის ჩატარებას გამორიცხავს. მისივე თქმით, ეს დემოკრატიის ღალატი იქნებოდა.

ბრიტანელი კანონმდებლები ბრექსიტის საბოლოო შეთანხმებას, სავარაუდოდ, ოქტომბერში უყრიან კენჭს. პრემიერის თქმით, შეთანხმების მისაღწევად ბრიუსელთან მეტი სამუშაოა საჭირო:

"ჩვენ გვინდა გავიდეთ კარგი გარიგებით და დარწმუნებული ვართ, რომ ამას მივაღწევთ. თუმცა, რა თქმა უნდა, კიდევ ბევრი მოლაპარაკებაა საჭირო".

2016 წლის რეფერენდუმით, დიდი ბრიტანეთის მოსახლეობამ ევროკავშირის დატოვებას დაუჭირა მხარი. ამ გადაწყვეტილებამ ბრიტანეთი პოლიტიკური და ეკონომიკური გადაწყვეტილებების წინაშე დააყენა და ამ დრომდე ჯერ კიდევ გადაუწყვეტელია, როგორი პირობებით დატოვებს დიდი ბრიტანეთი ევროკავშირს.

ტერეზა მეიმ BBC-სთან ინტერვიუში განაცხადა, რომ ბრექსიტის მისი გეგმა საშუალებას მისცემს ქვეყანას სავაჭრო შეთანხმებები იქონიოს სხვა ქვეყნებთან, აკრძალოს სამუშაო ძალის თავისუფლად გადაადგილება და ქვეყანა ევროკავშირის იურისდიქციიდან გამოიყვანოს.

ტერეზა მეისთან უთანხმოების გამო თანამდებობები დატოვეს ბრექსიტის საკითხებში მინისტრმა, დევიდ დევისმა და საგარეო საქმეთა მინისტრმა, ბორის ჯონსონმა. მათი განცხადებით, მთავრობა აპირებს გაატაროს ბრექსიტი, რომელიც მოსახლეობას 2016 წლის რეფერენდუმით არ აურჩევია.