რამდენიმე საათის წინ მოქალაქეების ნარკოტიკული საშუალება ფენტანილით მოწამვლის სავარაუდო შემთხვევების შესახებ ინფორმაცია გავრცელდა. ისინი საავადმყოფოებში კომატოზურ მდგომარეობაში არიან.

On.ge ამ საკითხზე თეთრი ხმაურის მოძრაობის წევრს, დავით სუბელიანს ესაუბრა. გთავაზობთ რამდენიმე აუცილებელ რეკომენდაციას.

  • თუ არ მოგიხმარიათ მანამდე რაიმე სახის ნარკოტიკული საშუალება, რომელიც ოპიოიდს შეიცავდა, ფენტანილის მოხმარება განსაკუთრებით სახიფათოა;
  • ფენტანილით ინტოქსიკაციის შემთხვევაში აუცილებელია მომხმარებელი არ იყოს მარტო და არ ჩაეძინოს, მუდმივად ესაუბრეთ და ალაპარაკეთ. როგორც სუბელიანი ამბობს, ჩაძინების დროს სუნთქვა რთულდება და რისკები იზრდება;
  • აუცილებლად დაურეკეთ სასწრაფო დახმარების სამსახურს და დეტალურად აცნობეთ პრობლემის შესახებ. ჯგუფის ადგილამდე მოსვლამდე კვლავ გააგრძელეთ ინტოქსიკაციის ქვეშ მყოფთან აქტიური კომუნიკაცია.

სუბელიანის თქმით, მსგავსი ტიპის ნარკოტიკული საშუალების თრობიდან გამოსასვლელად აუცილებელი მედიკამენტია ნალოქსონი. ის დღეს ქართულ სააფთიაქო ბაზარზე რამდენიმე ერთეულია დარჩენილი და მხოლოდ რეცეპტით გაიცემა.

ნალოქსონის ეფექტი

ქართული სამედიცინო პორტალის, Vidal.ge-ს ინფორმაციით, ნალოქსინი ოპიოიდურ ნივთიერების რეცეპტორებს ჰგავს, გამოდევნის ნარკოტიკულ საშუალებებს სხეულიდან და ჭარბი დოზის სიმპტომებს აქრობს. ნალოქსინი გამოიყენება მორფინის, ჰეროინის, კოდეინის, დიჰიდროკოდეინის, პეტიდინის, მეთადონის, პენტაზოცინის, ფენტანილის, აპომორფინისა და კლონიდინის მოქმედების დროს.

ვენაში შეყვანისას ეფექტი 30-120 წამში დგება და მოქმედებს 20-45 წუთის განმავლობაში. კუნთში ან კანქვეშ შეყვანისას მოქმედება იწყება 2-3 წუთში და გრძელდება 150-180 წუთის განმავლობაში.

ნალოქსინი ქართულ აფთიაქებში

On.ge მომხმარებლის სახელით დაუკავშირდა PSP-ს, ავერსისა და ჯპს-ს სააფთიაქო ქსელების ცხელ ხაზს და ჰკითხა ამ მედიკამენტის მარაგის შესახებ. აღმოჩნდა, რომ ჯპს-ში აღნიშნული მედიკამენტი საერთოდ არ აქვთ, PSP-ს მხოლოდ ერთ აფთიაქში და ისიც რამდენიმე ცალი, ავერსს თბილისის მაშტაბით 5 აფთიაქში, თუმცა მათი საერთო რაოდენობა 20 ერთეულამდეა.

ამავე თემაზე: