ნარკოპოლიტიკის ეროვნული პლატფორმის წევრი ორგანიზაციები ჯანდაცვის სამინისტროს რეკომენდაციით მიმართავენ, რეცეპტით გასაცემი წამლების სიიდან ამოიღოს პრეპარატი ნალოქსონი, რომელიც ოპიოიდების ჯგუფის ნარკოტიკის ერთადერთი ანტიდოტია. ამის შესახებ წამალდამოკიდებულების კვლევების ორგანიზაცია ალტერნატივა ჯორჯიას ხელმძღვანელმა დავით ოთიაშვილმა ჟურნალისტებს განუცხადა.

ჯანდაცვის სამინისტროს რეგულირების სააგენტოში მიიჩნევენ, რომ კონკრეტული პრეპარატის რეცეპტით გასაცემი წამლების ნუსხიდან ამოღებასთან დაკავშირებით, აუცილებელია კონსულტაციების გამართვა, რომელშიც მონაწილეობას ნარკოლოგებთან ერთად, ფარმაცევტებიც მიიღებენ.

"სპეციალურ კონტროლს დაქვემდებარებული ნივთიერებების ნუსხაში ნალოქსონის შეატანს, ნალოქსონი არის ანტიდოტი და შეტანა ამ სპეცკონტროლს დაქვემდებარებულ სიებში ან თუნდაც რეცეპტიდან ამოღება დაკავშირებული არის გარკვეულ პროცედურებთან", - განუცხადა ჟურნალისტებს რეგულირების სააგენტოს ნარკოტიკის ლეგალური ბრუნვის სამმართველოს უფროსმა ლალი დავითაიამ.

ნარკოტიკების ეროვნული პლატფორმის წარმომადგენლებს ჯანდაცვის სამინისტროსთან კითხვები აქვთ.

ადამიანის უფლებების სწავლებისა და მონიტორინგის ცენტრის იურისტის გურამ იმნაძის თქმით, საქართველოში არსებობს სპეციალური კომისია, რომელიც ახალ ფსიქოაქტიურ ნივთიერებების გამოვლენასა და შესწავლაზე უნდა იყოს ორიენტირებული, ეს კომისია უნდა აგროვებდეს ინფორმაციას და ხელს უნდა უწყობდეს კოორდინაციას.

"თუმცა კომისია ამ ახალი ნივთიერებების თაობაზე არის ფორმალურად შექმნილი, მათი მხრიდან გადადგმულ ნაბიჯებს ვერ ვხედავთ", - განაცხადა გურამ იმნაძემ საგანგებო ბრიფინგზე.

თეთრი ხმაურის მოძრაობის წევრის დავით სუბელიანის განცხადებით, მას არ გვაქვს განცდა, რომ კრიზისი დასრულდა.

"შესაძლოა საკლუბო ღონისძიება გაიმართოს და ისევ ფატალურად დასრულდეს", - განაცხადა დავით სუბელიანმა.

სუბელიანის თქმით, შესაძლოა უცნობი ნივთიერება სტიმულანტებთან შერეული ოპიატური საშუალებაა ან შესაძლოა, ეს იყოს ოპიოიდების ზედოზირებაც.

"იყო შემთხვევა, როცა მომხმარებლებმა მიიღეს MDMA და იგივე კლინიკური სურათი დაფიქსირდა", - განაცხადა დავით სუბელიანმა.

შინაგან საქმეთა სამინისტროში აცხადებენ, რომ უცნობი ნივთიერების შესწავლით მიზნით, ექსპერტიზა ტარდება, რაც გარდაცვალების ზუსტ მიზეზს დაადგენს.

ოფიციალური ინფორმაციით, ბოლო ერთ კვირაში უცნობი ნარკოტიკული საშუალების ზედოზირებით 4 ადამიანი გარდაიცვალა, 10-მდე კი ინტოქსიკაციის ნიშნებით სამედიცინო დაწესებულებაში გადაიყვანეს.

გაიგე მეტი: ნარკოლოგების ვარაუდი: უცნობი ნარკოტიკული ნივთიერება მეფედრონი არაა