საერთაშორისო გამჭვირვალობა - საქართველო აცხადებს, რომ სახელმწიფო კომპანიის ხელმძღვანელად დეპუტატ ჯაჭვლიანის წარდგენა კორუფციის ნიშნებს შეიცავს.

ორგანიზაცია განმარტავს, რომ სახელმწიფო კომპანიებთან დაკავშირებული ერთ-ერთი მთავარი კორუფციული საფრთხე არის ის, რომ ეს კომპანიები სახელმწიფო ბიუჯეტის ხარჯზე მმართველი პარტიასთან ან მთავრობასთან დაკავშირებული პირების „დაჯილდოების“ ინსტრუმენტად შეიძლება იქცნენ. TI-ის თქმით, სახელმწიფო კომპანიის სწორედ ამგვარ ინსტრუმენტად გამოყენების ეჭვს აჩენს ხსენებულ თანამდებობაზე ჯაჭვლიანის წარდგენა, რადგან გაურკვეველია, თუ რა კრიტერიუმით შეარჩია საქართველოს მთავრობამ ის:

"თუ გავიხსენებთ საპარლამენტო უმრავლესობის ყოფილი ლიდერის დავით საგანელიძის დანიშვნას საპარტნიორო ფონდის ხელმძღვანელად, შეიძლება ითქვას, რომ მსგავსი გადაწყვეტილებები ერთგვარი ტენდენციის სახეს იღებს. შეიძლება ასევე გავიხსენოთ ყოფილი მმართველი პარტიის, ენმ-ს წარმომადგენელი პოლიტიკოსების დასაქმება თბილისის მერიის საკუთრებაში არსებული კომპანიების სამეთვალყურეო საბჭოებში 2012 წლის საპარლამენტო არჩევნების შემდეგ".

TI ასევე იხსენებს, რომ მსგავსი ეჭვები გამოთქვა 2015 წელს თბილისის მეწარმეობის ხელშეწყობის ცენტრის შექმნის და მის ხელმძღვანელად ალექსანდრე მარგიშვილის დანიშვნის თაობაზეც:

"მსგავსი გადაწყვეტილების პრობლემურობაზე ისიც მეტყველებს, რომ ცენტრი დაარსებიდან ერთი წლის თავზე გაუქმდა. სახელმწიფოს კი არ განუხორციელებია მონიტორინგი, თუ რამდენად ეფექტურად დაიხარჯა ცენტრის დაფინანსებისთვის გამოყოფილი 2 მილიონი ლარი".

ორგანიზაცია მოუწოდებს საქართველოს მთავრობას, სახელმწიფო კომპანიების მართვასთან დაკავშირებული გადაწყვეტილებები მაქსიმალურად გამჭვირვალე პროცესის საშუალებით და ცხადი კრიტერიუმების საფუძველზე მიიღოს. ის განმარტავს, რომ სხვა შემთხვევაში, მნიშვნელოვნად გაიზრდება როგორც კორუფციის, ისე სახელმწიფო რესურსების არაეფექტურად განკარგვის რისკი.

გიორგი კვირიკაშვილმა განაცხადა, რომ მთავრობა კურორტ თეთნულდის განვითარების გეგმაზე მუშაობს და ამის გარდა აპირებს მთის კურორტების განსავითარებლად მენეჯმენტის გაძლიერებას. მისი განმარტებით, ამ მიზნით დაფუძნდება სახელმწიფო შპს, რომელსაც სოსო ჯაჭვლიანი უხელმძღვანელებს.