მთავრობის სხდომაზე პრემიერმა გიორგი კვირიკაშვილმა განაცხადა, რომ მთავრობა კურორტ თეთნულდის განვითარების გეგმაზე მუშაობს და ამის გარდა აპირებს მთის კურორტების განსავითარებლად მენეჯმენტის გაძლიერებას.

კვირიკაშვილის თქმით, ამ მიზნით დაფუძნდება სახელმწიფო შპს, რომელსაც სოსო ჯაჭვლიანი უხელმძღვანელებს.

"განვიხილეთ მენეჯმენტის გაძლიერების საკითხი და ჩავთვალეთ საჭიროდ, რომ მთის კურორტების განვითარების კომპანიაში დაფუძნდეს სახელმწიფო შპს, რომელსაც არჩევნების ჩატარების შემდეგ სოსო ჯაჭვლიანი უხელმძღვანელებს.

იგი არის ძალიან გამოცდილი სპორტსმენი, კინორეჟისორი, აქვს ძალიან კარგი საერთაშორისო გამოცდილება და ვთვლით, რომ ძალიან კარგი იქნება მისი ჩართვა ამ მიმართულებით" - განაცხადა პრემიერმა.

გიორგი კვირიკაშვილის თქმით, სოსო ჯაჭვლიანი მათ დაეხმარება, რათა მოკლე დროში შეიქმნას ის აუცილებელი ინფრასტრუქტურა, რაც კურორტის საერთაშორისო პრომოციას შეუწყობს ხელს:

"ბატონი სოსო, მოგეხსენებათ, არის ადგილობრივი, წარმოშობით სვანია და მისი ჩართვა მნიშვნელოვანი იქნება იმისთვის, რომ ჩვენ ეს კურორტი ისე განვავითაროთ, რომ მულახის თემის მაცხოვრებელთა ინტერესები იქნას მაქსიმალურად გათვალისწინებული. სოსო ჯაჭვლიანი მიიღებს აქტიურ მონაწილეობას ამ კომუნიკაციაშიც სახელმწიფოს მხრიდან".

პრემიერმინისტრი იმედოვნებს, რომ კერძო სექტორი სახელმწიფოს ინიციატივებს "აიტაცებს" და ქვეყნის განვითარების პროცესში სახელმწიფოს პარტნიორი იქნება.

სახელმწიფო შპს-ს დაფუძნება არჩევნების შემდეგ იგეგმება.