ევროპულმა საქართველომ უკრაინის მხარდასაჭერის რეზოლუცია შეიმუშავა, რომლის შეტანსაც პარლამენტში დღეს აპირებენ. პარლამენტის დეპუტატის, გიორგი კანდელაკის თქმით, საგარეო საქმეთა კომიტეტმა და შემდეგ პარლამენტმა რეზოლუციას მხარი უნდა დაუჭირონ, რათა შეფასება მისცეს აგრესიის ამ ფაქტს.

როგორც კანდელაკი განმარტას, რუსეთს ევროკავშირი და აშშ ახალ სანქციებს დაუწესებს და მნიშვნელოვანია, რომ მომავალი სანქციების მიზეზებსა და მოთხოვნებში ფიგურირებდეს საქართველოს ტერიტორიების დეოკუპაცია და ცეცხლის შეწყვეტის შეთანხმება.

მისივე თქმით, შარშან უკრაინის პრეზიდენტმა პოროშენკომ შესთავაზა საქართველოს მთავრობას ემუშავათ, რომ სანქციების მომავალ პაკეტებში საქართველოს ტერიტორიიდან რუსეთის ჯარების გაყვანისა და დევნილების დაბრუნების საკითხებიც მოხვედრილიყო.

"ეს წინადადება საქართველოს მხარემ ფაქტიურად უარყო, არაფრად არ ჩააგდო და ამ სანქციების პაკეტებში საქართველოს თემატიკის მოსახვედრად არაფერი არ გააკეთა. იმედი გვაქვს, და ეს რეზოლუცია სწორედ ამის შესაძლებლობას იძლევა, რომ ამჯერად მაინც საქართველო, სანამ ჯერ კიდევ ხელისუფლებაშია ქართული ოცნება, განზე არ გადგება და ჩვენი ქვეყნის ინტერესების უგულებელყოფას არ მოახდენს", — განაცხადა კანდელაკმა.

რუსულმა მხარემ 25 ნოემბერს სამ უკრაინულ გემს ქერჩის სრუტეში ცეცხლი გაუხსნა და შემდეგ დააკავა. გავრცელებული ინფორმაციით, უკრაინის მხრიდან რამდენიმე დაჭრილი და მძიმედ დაშავებულია.

უკრაინა და რუსეთი მომხდარში ერთმანეთს ადანაშაულებენ. უკრაინის პრეზიდენტმა პეტრე პოროშენკომ სამხედრო კაბინეტი შეკრიბა და განაცხადა, რომ შესაძლოა, საომარი მდგომარეობა გამოაცხადოს. გარდა ამისა, უკრაინის სამხედრო ძალები სრულ საბრძოლო მზადყოფნაში არიან მოყვანილი.

ამავე თემაზე: