ეკონომიკური თავისუფლების აქტში აღარ შევა ცვლილება, რომლითაც მთავრობას შეეძლო განათლების რეფორმისთვის დადგენილზე მეტი დაეხარჯა. აღნიშნული გადაწყვეტილების შესახებ საქართველოს პარლამენტის პლენარულ სხდომაზე ფინანსთა მინისტრის მოადგილემ, გიორგი კაკაურიძემ განაცხადა.

მისი თქმით, კომიტეტებზე განხილვისა და სავალუტო ფონდთან კომუნიკაციის შემდეგ ეკონომიკური თავისუფლების აქტში განათლების რეფორმის სახით გამონაკლისი ამოიღეს. ცვლილება დოკუმენტურად მეორე მოსმენის დროს აისახება.

ეკონომიკური თავისუფლების აქტში დაგეგმილ პრობლემურ ცვლილებებზე On.ge-მ 4 ოქტომბერს დაწერა. ამ კანონპროექტში დაგეგმილი ერთ-ერთი ცვლილებით, ეკონომიკური თავისუფლების შესახებ კანონპროექტი დროებით რეგულაციასაც ადგენდა და სახელმწიფოს უფლებას აძლევდა განათლების რეფორმაზე იმაზე მეტი დაეხარჯა, ვიდრე კანონით არის გაწერილი. უფლებამოსილების გამოყენება შესაძლებელი იქნებოდა არაუგვიანეს 2025 წლის, ერთჯერად და არაუმეტეს 3 წლის ვადით.

ეკონომიკის ექსპერტისთვის გიორგი პაპავასთვის გაუგებარი იყო, რას ემსახურებოდა მსგავსი დათქმა ეკონომიკური თავისუფლების აქტში.

"ჩემთვის გაუგებარია, თუ მთავრობა 2022 წლის ჩათვლით არ აპირებს ისეთი რეფორმის დაწყებას, რომელიც მნიშვნელოვან დეფიციტს გამოიწვევს, მომდევნო ორ წელში, რატომ უნდა დაიწყოს. შესაბამისად, ამ გამონაკლისის აუცილებლობა ჩემთვის გაუგებარია", — განმარტა ეკონომისტმა.

On.ge-ს კითხვაზე, ფინანსთა მინისტრის მოადგილემ, გიორგი კაკაურიძემ განაცხადა, რომ ამ დათქმის საფუძველი განათლების პრიორიტეტულობა იყო, თუმცა ამ კითხვაზე პასუხიდან, ერთ თვეში აღნიშნული დათქმა კანონპროექტიდან ამოიღეს. On.ge არკვევს გადაწყვეტილების მიღების მოტივაციას და ფინანსთა სამინისტროს განმარტებას მოგვიანებით შემოგთავაზებთ.

გაიგეთ, რა იცვლება ეკონომიკური თავისუფლების შესახებ კანონში