ხორავას ქუჩაზე მოკლული დავით სარალიძის მამა, ზაზა სარალიძე ყოფილ პრემიერ-მინისტრთან და ქართული ოცნების თავმჯდომარესთან, ბიძინა ივანიშვილთან შეხვედრას ითხოვს.

სარალიძემ ივანიშვილს ღია წერილით მიმართა. ის ფეისბუქზე წერს, რომ მაღალი ინტერესიდან გამომდინარე სურს, ივანიშვილს ადვოკატისა და მედიის თანდასწრებით შეხვდეს.

"ვითხოვ იმის განმარტებას, რატომ მიმართავთ ჩემ წინააღმდეგ ცილისწამებას, ასევე წარმომიდგინეთ მტკიცებულებები, რაც დაადასტურებს ნაციონალურ მოძრაობაში ჩემს კოორდინატორობას... შეხვედრაზე მე მზად ვარ მოგაწოდოთ ყველა კითხვაზე დეტალური განმარტება და იმავეს მოვითხოვ თქვენგან, დამისაბუთეთ თქვენ მიერვე გაჟღერებული ფაქტები", — წერს სარალიძე.

ხორავას ქუჩაზე მოკლული არასრულწლოვნის, დავით სარალიძის მამა თითქმის ორი თვეა პარლამენტის წინ საპროტესტო აქციებს მართავს და მოითხოვს შვილის მკვლელისა და საქმის გაყალბებაში მონაწილე პირების დაკავებას. ზაზა სარალიძეს მიაჩნია, რომ ხელისუფლების წარმომადგენლები მკვლელობაში დამნაშავე პირებს ხელს აფარებენ.

26 ოქტომბერს ერთ-ერთი ინტერვიუს დროს ბიძინა ივანიშვილმა განაცხადა, რომ ზაზა სარალიძე რუსთაველზე ნაციონალურ მოძრაობას აქციებისთვის ადგილს უნახავს.

"ის, რომ რუსთაველზე ადგილს უნახავს ნაციონალურ მოძრაობას, კარგად ვიცით. ხელს ნუ შეუშლის გამოძიებას, არ არის ეს ზეწოლა ნორმალური, არ არის საჭირო ქუჩა, ეს ხელისუფლება ამას არ იმსახურებს. კიდევ ერთხელ ვუსამძიმრებ, მაგრამ ესე არ შეიძლება, განა კარგად არ ვიცით, რომ ეს პოლიტიზირებულია ნაციონალური მოძრაობისგან? ის რომ ნაციონალური მოძრაობის კოორდინატორი იყო, რათ უნდათ, რომ ააგო ეს კარავი იქ?", — განაცხადა ბიძინა ივანიშვილმა.

მანამდე კი ყოფილმა პრემიერმა განაცხადა, რომ დათო სარალიძისა და სანდრო გირგვლიანის მკვლელობის ერთმანეთთან შედარება "უზნეობაა".