ქართული ოცნების თავმჯდომარემ, ბიძინა ივანიშვილმა ხორავას ქუჩის საქმეზე ისაუბრა და განაცხადა, რომ ამ საკითხის სანდრო გირგვლიანის მკვლელობის საქმესთან შედარება ცინიზმი და უზნეობაა.

"გირგვლიანი მოკლა სახელმწიფომ და სახელმწიფომ მათ მკვლელებს ხელი დააფარა. ჯერ არ დასრულებულა სასამართლო, მეორე მოდის და მესამე ახლავს. ის, რომ ხორავას ქუჩაზე მომხდარი ტრაგედია დღეს გადაიქცა სიმბოლოდ და პარალელებს გირგვლიანთან ავლებენ არის ცინიზმი და უზნეობა", — განაცხადა ივანიშვილმა.

მისი თქმით, ხორავას საქმის გამოძიებამ ვერ დაადგინა, რომ ხელისუფლებას ამ მკვლელობაში რაიმე ინტერესი ჰქონდა. მისივე თქმით, სახელმწიფო ინტერესი არის გამოძიება სწორად წარიმართოს.

"ის, რომ საგამოძიებო კომისიამაც მინიშნება ვერ გააკეთა, რომ ხელისუფლებას ჰქონდა ინტერესი ხელი დაეფარებინა რამისთვის ან რაიმე დაემალა. ის რომ მოსამართლემ არ გაიზიარა გამოძიების პოზიცია ეს გახდა ამ აქციების და ვნებათაღელვის მიზეზი", — აღნიშნა ივანიშვილმა.

ხორავას ქუჩაზე მოკლული არასრულწლოვნის, დავით სარალიძის მამა 44 დღეა პარლამენტის წინ საპროტესტო აქციებს მართავს და მოითხოვს შვილის მკვლელისა და საქმის გაყალბებაში მონაწილე პირების დაკავებას. ზაზა სარალიძეს მიაჩნია, რომ ხელისუფლების წარმომადგენლები მკვლელობაში დამნაშავე პირებს ხელს აფარებენ.