10-წლიანი ამბიციური პროექტი, რომლის მიზანიც მსოფლიოში ყველა ცნობილი მცენარის, ცხოველისა და სოკოს დნმ-ის გაშიფვრაა, დაიწყო.

პროექტი Earth BioGenome დაახლოებით ხუთი მილიარდი ამერიკული დოლარი დაჯდება, მის ფარგლებში კი მეცნიერებმი 1.5 მილიონი სხვადასხვა ორგანიზმის დნმ-ს გაშიფრავენ.

"ეს პროექტი ისეთივე მნიშვნელოვანია, როგორც "ადამიანის გენომის პროექტი", რომლის ფარგლებშიც 1993-დან 2003 წლამდე მეცნიერებმა ადამიანის გენომი სრულად გაშიფრეს. მომავალი ათი წლის განმავლობაში მოპოვებული ინფორმაცია უამრავი ახალი აღმოჩენის წყარო გახდება, უკეთ გავიგებთ, თუ როგორ მუშაობს ევოლუცია, უკეთ შევძლებთ გადაშენების პირას მყოფი ცხოველების დაცვას, გადავჭრით სოფლის მეურნეობაში არსებულ პრობლემებსაც", - აცხადებს კალიფორნიის უნივერსიტეტის პროფესორი და პროექტის თავმჯდომარე ჰარის ლუინი.

ბიომრავალფეროვნების სწრაფმა კლებამ და ცხოველების მასობრივმა გადაშენებამ კი ეს პროექტი კიდევ უფრო მნიშვნელოვანი გახადა.

"ჩვენ სასწრაფოდ უნდა აღვწეროთ დედამიწაზე არსებული სიცოცხლე, რაც მარტივი რამ არ არის, თუმცა ამის გაკეთება აუცილებელია", - აცხადებს ლუინი.

ამჟამად ევკარიოტული ორგანიზმების მხოლოდ 0.2 პროცენტის გენომია გაშიფრული, რაც დაახლოებით 3 500 ორგანიზმია, მაღალი სიზუსტის მონაცემები კი მხოლოდ 100 ორგანიზმზე გვაქვს. ყველა არსებული სახეობის გენომის გაშიფვრა მაღალ საერთაშორისო ჩართულობას მოითხოვს, მაგალითად, პროექტის ფარგლებში აშშ-ს მხარე ათეულობით ათას ხერხემლიანს, ჩინეთი 10 000 მცენარეს, ჭიანჭველათა გენომის საერთაშორისო ალიანსი 200 სხვადასხვა სახეობის ჭიანჭველას, ხოლო სენგერის ინსტიტუტი კი ბრიტანეთში მცხოვრები 66 000 ათასი სახეობის ორგანიზმის დნმ-ს გაშიფრავს.

მეცნიერები თვლიან, რომ პროექტი წარმოუდგენლად დიდი რაოდენობის ინფორმაციას დააგროვებს, რომელიც თავისი მასშტაბებით ასტრონომიაში დაგროვილი ინფორმაციის რაოდენობასაც გადააჭარბებს.