საარჩევნო კამპანიის პერიოდში მმართველი გუნდის მიერ მხარდაჭერილმა საპრეზიდენტო კანდიდატმა, სალომე ზურაბიშვილმა 5 395 983,85 ლარის შემოწირულობა მიიღო.

ყველა გადარიცხვა 23 აგვისტოდან 28 ოქტომბრამდე პერიოდით თარიღდება. ჯამში, სალომე ზურაბიშვილს თანხა 431-მა იურიდიულმა და ფიზიკურმა პირმა შეწირა. შეწირული თანხის ყველაზე დიდი ნაწილი ზურაბიშვილმა ოქტომბერში მიიღო — სულ 4 832 679,30 ლარი.

ზურაბიშვილის მსხვილი შემწირველები

საპრეზიდენტო კანდიდატის შემწირველებს შორის არიან პარლამენტის თავმჯდომარე, პარლამენტის დეპუტატები, თბილისის მერი და ყოფილი პრემიერ-მინისტრის, ბიძინა ივანიშვილის ძმა.

ზურაბიშვილის მსხვილ შემწირველებს შორის არიან ქართუ ბანკისა და ქართუ ჯგუფის დირექტორები, რომლებმაც 105 000 გადარიცხეს.

გარდა ამისა, ბიზნესმენ ბადრი პატარკაციშვილის ოჯახის წევრებმა 180 000 ლარი გადარიცხეს. ხელისუფლებისგან მხარდაჭერილ კანდიდატს თანხა შეწირეს ბიზნესმენის დედამ, ნათელა პატარკაციშვილმა და მისმა დებმა, ნანა პატარკაციშვილმა და მზია თოთლაძემ. თითოეულმა მათგანმა საპრეზიდენტო კანდიდატს 60 ათასი ლარი გადაურიცხა.

50 ათასი ლარი გადაურიცხა ზურაბიშვილს კოკა-კოლას დირექტორმა და ლაღიძის წყლის მეწილემ, ვახტანგ ლაღიძემ. ასევე, 20 000 ლარი შეწირა მთაწმინდის პარკის დირექტორმა.

სამშენებლო კომპანია შპს არქის სხვადასხვა პროექტის მეწილეებმა და დირექტორებმა სალომე ზურაბიშვილს ჯამში 300 000 ლარი გადაურიცხეს. კიდევ ერთი სამშენებლო კამპანია ანაგის 11-მა თანამშრომელმა ქართული ოცნების მიერ მხარდაჭერილ საპრეზიდენტო კანდიდატს, სალომე ზურაბიშვილს 179 000 ლარი გადაურიცხა.

კამპანია #ნუყიდისაქართველოს ფარგლებში მოქალაქეები ზურაბიშვილს სიმბოლურად 30 თეთრ ურიცხავდნენ. კამპანია მას შემდეგ დაიწყეს, რაც პრეზიდენტობის კანდიდატმა 2008 წლის აგვისტოს ომის დროს სამხედრო მოქმედებების დაწყებაში საქართველო დაადანაშაულა.

ჯამში საკმაოდ სოლიდური თანხა შეწირეს სალომე ზურაბიშვილი ღუდუშაურისა და ჩაჩავას კლინიკების ექიმებმა, რომლებმაც ზურაბიშვილის ათეულობით ათასი ლარი გადაურიცხეს. როგორც შემდგომში აღმოჩნდა ორივე საავადმყოფოს აქციების მფლობელი ქართული ოცნების ელგიჯა გოცირიძეა.

შემოწირულობიდან რამდენიმე დღეში ჩაჩავას კლინიკის გინეკოლოგმა ნიკოლოზ კინტრაიამ, რომელმაც სალომე ზურაბიშვილს 20 ათასი ლარი შესწირა, ფეისბუქზე დაწერა, რომ არჩევნებში ხმას ქართული ოცნების მიერ მხარდაჭერილ კანდიდატს არ აძლევდა.