ბიზნესმენ ბადრი პატარკაციშვილის ოჯახის წევრებმა 17 ოქტომბერს ხელისუფლებისგან მხარდაჭერილ კანდიდატს, სალომე ზურაბიშვილს ჯამში 180 000 ლარი შეწირეს. ეს ის დღეა, როცა პროკურატურამ ბადრი პატარკაციშვილის მკვლელობის მომზადების საქმე გახსნილად გამოაცხადა და მტკიცებულებად 2007 წლის აუდიოჩანაწერი გაასაჯაროვა.

ხელისუფლებისგან მხარდაჭერილ კანდიდატს თანხა შეწირეს ბიზნესმენის დედამ, ნათელა პატარკაციშვილმა და მისმა დებმა, ნანა პატარკაციშვილმა და მზია თოთლაძემ. თითოეულმა მათგანმა საპრეზიდენტო კანდიდატს 60 ათასი ლარი გადაურიცხა.

პროკურატურის ჩანაწერები

პროკურატურის ინფორმაციით, მათ ბიზნესმენ ბადრი პატარკაციშვილის მკვლელობის მომზადების საქმე გახსნეს, რაშიც 2007 წლის ფარული ჩანაწერები დაეხმარათ, რომელიც 2016 წელს ამოიღეს.

უწყების ინფორმაციით, მათ მოიპოვეს მტკიცებულება, რომელშიც ისმის, რომ პატარკაციშვილის მკვლელობის მომზადების საკითხი საქართველოს ექს-პრეზიდენტთან, მიხეილ სააკაშვილთან იყო შეთანხმებული. ამ საქმეზე ბრალი წაუყენეს სამ პირს: კონსტიტუციური უსაფრთხოების დეპარტამენტის თბილისის მთავარი სამმართველოს მეორე სამმართველოს პირველი სამსახურის ყოფილ უფროსს, მეორე მთავარი სამმართველოს უფროსის ყოფილ მოადგილესა და ამავე სამმართველოს მეორე სამსახურის უფროსს.

პროკურატურის ინფორმაციით, 2007 წლის 4 თებერვლის ჩანაწერში კუდის მაღალჩინოსანი ესაუბრება ბადრი პატარკაციშვილის დაცვის წევრს და მის გადმობირებას ცდილობდა.

"საუბრისას გ.დ. ადასტურებს, რომ მკვლელობის მომზადების საკითხი სანქცირებულია საქართველოს იმდროინდელი პრეზიდენტის მიხეილ სააკაშვილის მიერ, რადგან ბადრი პატარკაციშვილი მათი პოლიტიკური ოპონენტი და ხელისუფლების დაუძინებელი მტერია. ჩანაწერის მიხედვით, ასევე დგინდება, რომ ლიკვიდაცია კუდმა უნდა განახორციელოს", — აღნიშნულია პროკურატურის მიერ გავრცელებულ განცხადებაში.

უწყების ინფორმაციით, კუდის სამი მაღალჩინოსნის მიმართ სისხლისამართლებრივი დევნა მიმდინარეობს საქართველოს სისხლის სამართლის კოდექსის 18-109-ე მუხლის მეორე ნაწილის "ე" ქვეპუნქტითა და ამავე მუხლის მესამე ნაწილის "ვ" ქვეპუნქტით და ამავე კოდექსის 333-ე მუხლის პირველი ნაწილით, რაც სასჯელის სახედ თექვსმეტიდან ოც წლამდე ვადით თავისუფლების აღკვეთას ითვალისწინებს.

ამავე თემაზე: