ჩაჩავასა და ღუდუშაურის კლინიკების აქციების მფლობელი, რომლის ექიმებმაც მმართველი გუნდის მიერ მხარდაჭერილ კანდიდატს, სალომე ზურაბიშვილის ათობით ათასი ლარი შეწირეს, ქართული ოცნების მაჟორიტარი დეპუტატი ელგუჯა გოცირიძეა.

ელგუჯა გოცირიძე On.ge-სთან საუბრისას აცხადებს, რომ მითითება შემოწირულობის სალომე ზურაბიშვილისთვის გადარიცხვასთან დაკავშირებით, არავის გაუცია. მას ასევე უკვირს, რატომ უკავშირებენ მას და ექიმების შეწირულობას ერთმანეთს.

"კლინიკის მენეჯმენტში არ ვერები. საერთოდ, თქვენგან გავიგე პირველად ექიმების მიერ განხორციელებულ შეწირულობაზე. ეს საკითხები საერთოდ არ მეხება და ექიმების გადასაწყვეტია, ვის დაუჭერენ მხარს და როგორ", — ამბობს დეპუტატი.

ქართული ოცნების მიერ მხარდაჭერილი საპრეზიდენტო კანდიდატის, სალომე ზურაბიშვილის შემწირველთა სიაში ჩაჩავასა და ღუდუშაურის კლინიკების თანამშრომლები მოხვდნენ. შეწირვების შესახებ ინფორმაცია აუდიტის სამსახურის ვებგვერდზეა გამოქვეყნებული. 2 და 3 ოქტომბერს ზურაბიშვილმა თითოეული ექიმისგან 7-დან 50 ათას ლარამდე შემოწირულობა მიიღო.

On.ge-მ ორივე კლინიკის მხოლოდ 7 თანამშრომლის იდენტიფიცირება მოახერხა, რომლებმაც ჯამში ზურაბიშვილს 154 ათასი გადაურიცხა.

შემწირველთა სია ასე გამოიყურება:

  • ნატა ყაზახაშვილი 50 ათასი ლარი - ჩაჩავას კლინიკის გენერალური დირექტორობის მოვალეობის შემსრულებელი;
  • ზურაბ დარახველიძე 50 ათასი ლარი - დარახველიძე არის ჩაჩავას კლინიკის მეან-გინეკოლოგი. ქართული ოცნებისთვის სხვადასხვა დროს ჯამში გადარიცხული აქვს 65 ათასი ლარი;
  • ნიკოლოზ კინტრაია 20 ათასი ლარი - ჩაჩავას კლინიკის გინეკოლოგიური სექტორის ხელმძღვანელი. 2016-17 წლებში ქართულ ოცნებას შესწირა 100 ათასი ლარი;
  • პალიკო კინტრაია 10 ათასი ლარი - მეან-გინეკოლოგი, 2002 წლიდან ჩაჩავას კლინიკის სამეთვალყურეო საბჭოს თავმჯდომარე. ქართული ოცნებისთვის შეწირული აქვს 60 ათასი ლარი;
  • რევაზ სულუხია 10 ათასი ლარი - ღუდუშაურის კლინიკის პერინატალური დეპარტამენტის ხელმძღვანელი. 2016 წელს ქართულ ოცნებას შესწირა 40 ათასი ლარი;
  • ლელა ბრეგაძე 7 ათასი - ღუდუშაურის კლინიკის ექიმი. 2016 წელს ქართულ ოცნებას 9 ათასი ლარი შესწირა;
  • მარიამ გოცირიძე 7 ათასი ლარი - ჩაჩავას კლინიკის რადიოლოგი. 2016 წელს ქართულ ოცნებას 25 ათასი ლარი შესწირა.

ამავე თემაზე: