ჩაჩავას კლინიკის გინეკოლოგი ნიკოლოზ კინტრაია, რომელმაც სალომე ზურაბიშვილს 20 ათასი ლარი შესწირა, ფეისბუქზე წერს, რომ არჩევნებში ხმას ქართული ოცნების მიერ მხარდაჭერილ კანდიდატს არ აძლევს.

ამ ეტაპისთვის ფეისბუქზე კინტრაიას პოსტი მისაწვდომი არაა.

ფოტო: ნიკოლოზ კინტრაია / Facebook

ნიკოლოზ კინტრაია ჩაჩავასა და ღუდუშაურის კლინიკების იმ ექიმებს შორისაა, რომელმაც ქართული ოცნების მირ მხარდაჭერილ კანდიდატს, სალომე ზურაბიშვილს ჯამში რამდენიმე ათეული ათასი ლარი შესწირა.

On.ge დაინტერესდა თუ რატომ გადაურიცხა ნიკოლოზ კინტრაიამ სალომე ზურაბიშვილს სოლიდური თანხა მიუხედავად იმისა, რომ მისი ამომრჩეველი არ არის. თუმცა კინტრაია სოციალურ ქსელში ჩვენს მინაწერებს არ პასუხობს.

On.ge-მ ორივე კლინიკის მხოლოდ 7 თანამშრომლის იდენტიფიცირება მოახერხა, რომლებმაც ჯამში ზურაბიშვილს 154 ათასი გადაურიცხა.

შემწირველთა სია ასე გამოიყურება:

  • ნატა ყაზახაშვილი 50 ათასი ლარი - ჩაჩავას კლინიკის გენერალური დირექტორობის მოვალეობის შემსრულებელი;
  • ზურაბ დარახველიძე 50 ათასი ლარი - დარახველიძე არის ჩაჩავას კლინიკის მეან-გინეკოლოგი. ქართული ოცნებისთვის სხვადასხვა დროს ჯამში გადარიცხული აქვს 65 ათასი ლარი;
  • ნიკოლოზ კინტრაია 20 ათასი ლარი - ჩაჩავას კლინიკის გინეკოლოგიური სექტორის ხელმძღვანელი. 2016-17 წლებში ქართულ ოცნებას შესწირა 100 ათასი ლარი;
  • პალიკო კინტრაია 10 ათასი ლარი - მეან-გინეკოლოგი, 2002 წლიდან ჩაჩავას კლინიკის სამეთვალყურეო საბჭოს თავმჯდომარე. ქართული ოცნებისთვის შეწირული აქვს 60 ათასი ლარი;
  • რევაზ სულუხია 10 ათასი ლარი - ღუდუშაურის კლინიკის პერინატალური დეპარტამენტის ხელმძღვანელი. 2016 წელს ქართულ ოცნებას შესწირა 40 ათასი ლარი;
  • ლელა ბრეგაძე 7 ათასი - ღუდუშაურის კლინიკის ექიმი. 2016 წელს ქართულ ოცნებას 9 ათასი ლარი შესწირა;
  • მარიამ გოცირიძე 7 ათასი ლარი - ჩაჩავას კლინიკის რადიოლოგი. 2016 წელს ქართულ ოცნებას 25 ათასი ლარი შესწირა.

როგორც შემდეგში აღმოჩნდა ჩაჩავასა და ღუდუშაურის აქციების მფლობელი ქართული ოცნების დეპუტატი, ელგუჯა გოცირიძეა. გოცირიძე On.ge-სთან საუბრისას აცხადებს, რომ მითითება შემოწირულობის სალომე ზურაბიშვილისთვის გადარიცხვასთან დაკავშირებით, არავის გაუცია. მას ასევე უკვირს, რატომ უკავშირებენ მას და ექიმების შეწირულობას ერთმანეთს.