პენსილვანიის შტატის ქალაქ პიტსბურგში, სინაგოგაში მომხდარი სროლის შედეგად 11 ადამიანი დაიღუპა. მათგან ყველაზე ასაკოვანი 97 წლისაა, ხოლო ყველაზე ახალგაზრდა — 54-ის. ინფორმაციას BBC ავრცელებს.

დაღუპულებს შორის ამერიკული ოჯახების რამდენიმე წევრია — ხანდაზმული ცოლ-ქმარი და ასევე ორი ძმა. დაშავებულია 6 ადამიანი, მათ შორის, 4 პოლიციელია.

თავდასხმაში ბრალდებული 46 წლის რობერტ ბაუერსია. მას 29 მუხლით აქვს ბრალი წაყენებული. ის პოლიციასთან ორმხრივი სროლის შედეგად დაშავდა და საავადმყოფოშია გადაყვანილი.

ებრაელთა სამლოცველო სახლში შევარდნისას, თავდამსხმელი სამ პისტოლეტსა და ერთ ავტომატს იყენებდა. ესაა ყველაზე მასშტაბური ანტისემიტური თავდასხმა ამერიკის ისტორიაში. ფედერალურმა პროკურატურამ თავდამსხმელის წინააღმდეგ, შესაძლოა, სიკვდილით დასჯა მოითხოვოს.