გორში ცხრა წლის გოგოს, ნანა ბერიაშვილის მკვლელობის საქმეზე შსს-მ ბრალდებული დააკავა. ინფორმაცია ამის შესახებ შსს-მ On.ge-ს დაუდასტურა. უწყების ინფორმაციით, ბრალდებული 1984 წელს დაბადებული და წარსულში ნასამართლევია.

შინაგან საქმეთა მინისტრის მოადგილის კახა საბანაძის თქმით, ბრალდებული ცხელ კვალზე დააკავეს. მისივე თქმით, ისინი მიყვნენ იმ მარშრუტს, რომლითაც ბავშვი მუდმივად გადაადგილდებოდა. გამოძიების ფარგლებში დეტალურად დაათვალიერეს სახლები, სადაც საეჭვო სისხლის კვალი იპოვეს. მინისტრის მოადგილეს გოგონას დაზიანებებზე და საქმის სხვა დეტალებზე არ უსაუბრია.

გამოძიება წინასწარი შეცნობით არასრულწლოვნის მიმართ დამამძიმებელ
გარემოებაში ჩადენილი განზრახ მკვლელობის ფაქტზე, საქართველოს სსკ-ს 109-ე მუხლის მე-2 ნაწილის "ბ" ქვეპუნქტით მიმდინარეობს.

მომხდარ ფაქტზე გამოძიება სპეციალურმა საგამოძიებო ჯგუფმა დაიწყო, რომელსაც კახა საბანაძე ხელმძღვანელობს.

ნანა ბერიაშვილი გუშინ, 25 ოქტომბერს შუადღით ცეკვაზე წავიდა და მას შემდეგ აღარავის უნახავს. ცხედარი შემდეგ იმავე დღეს საღამოს მდინარე ლიახვის ნაპირზე იპოვეს.

ოჯახის წევრები მკვლელობის მოტივზე არ საუბრობენ. ახლობლები ყვებიან, რომ გოგონა ხელ-ფეხშეკრული იპოვეს.