თურქეთის ხელისუფლება 38 ათასი პატიმრის გათავისუფლებას აპირებს იმისთვის, რომ 15 ივლისს მომხდარი სახელმწიფო გადატრიალების მცდელობაში ბრალდებული პირებისათვის ციხეებში ადგილები გაათავისუფლოს. ინფორმაციას ამის შესახებ Reuters ავრცელებს.

გამოცემის ცნობით, შესაბამისი გადაწყვეტილება თურქეთის ხელისუფლებამ ე.წ. კონტროლირებადი გათავისუფლების რეფორმის შესაბამისად მიიღო, რომლის შესახებაც დღეს ქვეყნის იუსტიციის მინისტრმა, ბეკირ ბოზდაგმა განაცხადა:

"ეს ზომა ამნისტიას არ წარმოადგენს. პირველ ეტაპზე პენიტენციურ დაწესებულებას 38 ათასი პატიმარი დატოვებს".

მას არ დაუკონკრეტებია, რატომ გახდა აღნიშნული რეფორმის მიღება საჭირო, თუმცა, როგორც ცნობილია, უკანასკნელი 15 წლის განმავლობაში თურქეთის პატიმრების რაოდენობა გასამმაგებულია.

აღნიშნული რეფორმის თანახმად, ციხეს ვადამდე ადრე, გამოსაცდელი ვადით, ის პატიმრები დატოვებენ, რომელთა სასჯელი 2 წელს არ აღემატება. ე.წ. კონტროლირებადი გათავისუფლების სქემა არ მოიაზრებს იმ პატიმრების გათავისუფლებას, რომლებიც სასჯელს ტერორიზმის, მკვლელობის ძალადობის და სექსუალური ხასიათის დანაშაულის ბრალდებით იხდიან. გარდა ამისა, ამ დრომდე მათ თავიანთი სასჯელის 2/3 უკვე მოხდილი უნდა ჰქონდეთ.

15 ივლისს თურქეთში, ხელისუფლების დამხობის მიზნით, ქვეყნის რამდენიმე ლოკაციაზე შეიარაღებული დაჯგუფების თავდასხმას 300-მდე ადამიანის სიცოცხლე ემსხვერპლა, აჯანყებასთან კავშირის ბრალდებით თანამდებობიდან გადააყენეს და დააკავეს ათასობით მოსამართლე, მაღალი თანამდებობაზე მყოფი სამხედროები, პოლიციელები და სამოქალაქო პირები.

გარდა ამისა, დახურულია 130-მდე მედიასაშუალება, დაკავებულები არიან ჟურნალისტები. ქვეყანაში სამთვიანი საგანგებო მდგომარეობაა გამოცხადებული.

თურქეთში მომხდარი ამბოხის გამომწვევი მიზეზების, მისი ორგანიზატორებისა და მომხდარის შესახებ დეტალურ ინფორმაციას შეგიძლიათ გაეცნოთ აქ: