ტელეკომპანია რუსთავი 2-მა, კომუნიკაციების კომისიიდან მიღებული წერილის მიუხედავად, გადაწყვიტა, რომ საეთერო ბადეში დატოვოს სახელისუფლებო პარტიისგან მხარდაჭერილი კანდიდატის, სალომე ზურაბიშვილის ანტიპიარული რეკლამა. არხის იურისტმა, თამთა მურადაშვილმა On.ge-ს არგუმენტები გააცნო.

კომისიის თავმჯდომარის წერილს ცენზურის მცდელობად აფასებს ტელეკომპანია რუსთავი 2-ის იურისტი. მისი თქმით, საარჩევნო პროცესში კომისია წარმოჩინდა, როგორც მხარე.

რუსთავი 2-ის არგუმენტები

კლიპი I

კომუნიკაციების კომისიას მიაჩნია, რომ გადაცემა რეაქციის იმ ფრაგმენტის გამოყენებით, სადაც ჟურნალისტი კითხვას სვამს ირღვევა მაუწყებლობის შესახებ კანონი. რუსთავი 2-ის იურისტს მიაჩნია, რომ კომისიის წერილში კანონი არასწორადაა განმარტებული, რადგან ამ კლიპში ჟურნალისტი რეალურად არ მონაწილეობს.

"მხოლოდ რესპონდენტის პასუხის მიხედვით, მაყურებლისთვის გაუგებარი იქნებოდა რას პასუხობს საპრეზიდენტო კანდიდატი ამ სიტყვებით. ეს არის საჯარო კადრები, და კლიპის ავტორმა გამოიყენა საჯარო მასალა", — ამბობს მურადაშვილი.

კლიპი II

ერთ-ერთ სარეკლამო რგოლში სალომე ზურაბიშვილი მოხსენიებულია მოღალატედ. კომისიამ მიიჩნია, რომ სიტყვა "მოღალატე" არღვევს ზნეობრივ ნორმებს და ბღალავს ფიზიკურ პირს. ტელეკომპანიას კი მიაჩნია, რომ ვიდეოკლიპის შინაარსიდან გამომდინარე ნათელია, რომ ეს სიტყვა პოლიტიკური შეფასებაა.

"სალომე ზურაბიშვილიც გამოხატავს და აფიქსირებს საკუთარ პოზიციას თავისუფლად, მის მიერ შერჩეული ფრაზებით, სიტყვებით, ლოზუნგებით და მისი სიტყვის თავისუფლების რეალიზაცია არავის შეუზღუდავს. შესაბამისად, მოცემულ შემთხვევაში, გაუგებარია რატომ უნდა აეკრძალოს სხვა პოლიტიკურ სუბიექტს სალომე ზურაბიშვილზე აზრისა და შეფასების თავისუფლად დაფიქსირების საშუალება, როდესაც თავად სალომე ზურაბიშვილი თავისუფალია მის სიტყვასა და გამოხატვაში და გამოხატვის ფორმებში", — განმარტავს იურისტი.

კლიპი III

კომისიის განმარტებით, ერთ-ერთი სარეკლამო რგოლი შეიცავს უხამსი შინაარსის გამონათქვამს. იმის გამო, რომ მაუწყებლებისთვის მიწერილ წერილში დაკონკრეტებული არაა რომელი კლიპზე მიუთითებს კომისია, ან რა სიტყვა მიიჩნია უხამსად ტელეკომპანიის იურისტს საკითხის ვარაუდის დონეზე შეფასება უწევს.

"ვვარაუდობთ, რომ შესაძლოა ეს მითითება იმ კონკრეტულ კლიპს ეხებოდეს, სადაც ციტირებულია კანდიდატის მიერ საჯაროდ ნათქვამი უცენზურო სიტყვა. აქ ლოგიკურად ჩნდება კითხვა, როცა ტელეკომპანია აშუქებს პრეზიდენტის აზრებს, ლოზუნგებს და სიტყვებს, მათ შორის, მის მიერვე ნათქვამ უცენზურო ფრაზებსაც, ხოლო ტელეკომპანია ამას ეთერში უშვებს, ამით ამ სიტყვების ავტორი არღვევს კანონს, თუ როგორც კომისია მიგვითითებს თავად ტელევიზია?!" — აღნიშნავს რუსთავი 2-ის იურისტი.

ამავე თემაზე: