მეორე დღეა, რაც ტელეკომპანიებმა კომუნიკაციების კომისიის თავმჯდომარისგან, კახა ბექაურისგან მმართველი პარტიის მხარდაჭერილი კანდიდატის, სალომე ზურაბიშვილის ანტირეკლამების დაუყოვნებლივ ამოღების შესახებ წერილი მიიღეს. წერილით ირკვევა, რომ კომისიამ შეაფასა პოლიტიკური რეკლამის შინაარსი და ის "არაეთიკურად", "ზნეობრივი ნორმების შემბღალავად" და "უხამსობის" შემცველად მიიჩნია.

რატომ შეაფასა კომისიამ პოლიტიკური რეკლამის შინაარსი

კომუნიკაციების კომისიიდან წერილობით მიღებული კომენტარით ირკვევა, რომ რეკლამის კანონმდებლობასთან შესაბამისობის შესაფასებლად TV პირველმა, საზოგადოებრივმა მაუწყებელმა და იმედმა მიმართეს.

იმის მიუხედავად, რომ რეკლამის შინაარსზე პასუხისმგებელი მისი განმთავსებელია (პარტიაა), კომისიამ მაუწყებლებისთვის მიწერილი წერილის მიზეზი ასე განმარტა:

"მაუწყებლობის შესახებ კანონის დაცვა და მაუწყებლობის სფეროში მოქმედი კანონმდებლობის მოთხოვნების შესრულებაზე ზედამხედველობა და კონტროლი კომისიის პირდაპირი ვალდებულებაა."

რატომ (არ) უნდა დარჩეს რეკლამები მაუწყებლების ეთერში

აჭარის ტელევიზია და რუსთავი 2 არ იზიარებენ კომუნიკაციების კომისიის თავმჯდომარის სახელით მიწერილი წერილის შინაარსს და სარეკლამო კლიპებს ეთერში ტოვებენ. On.ge-ს მარეგულირებლისთვის მიწერილი წერილის ავტორებიდან მხოლოდ იმედის იურისტმა უპასუხა, TV პირველთან დაკავშირება ვერ მოხერხდა, საზოგადობრივ მაუწყებელში კი მიწერილ კითხვებს, რამდენიმე საათის გასვლის მიუხედავად, არ უპასუხეს.

ტელევიზიების პოზიცია

ტელეკომპანია იმედის იურისტი, ანდრია ლაშხი On.ge-სთან საუბრისას ამბობს, რომ პოლიტიკური რეკლამის შინაარსთან დაკავშირებით მსჯელობა კომუნიკაციების კომისიის უფლებამოსილება არაა, თუმცა აღნიშნავს, რომ ზურაბიშვილის ანტიპიარულ კლიპთან დაკავშირებით მაინც ჰკითხეს.

"მარეგულირებელი კომისიის გადაწყვეტილებაა და მისი არშესრულება უნდა მოხდეს სასამართლო გადაწყვეტილების საფუძველზე", — განმარტავს ლაშხი.

აჭარის ტელევიზიის დირექტორი, ნათია კაპანაძე მიიჩნევს, რომ მიღებული წერილიდან არ დგინდება აღნიშნულ საკითხზე კომისიამ იმსჯელა თუ არა და არ იცნობს შესაბამის ოქმს. რეკლამები რჩება ბადეში, თუმცა მიღებული წერილიდან გამომდინარე, მაუწყებლის შესაბამისი სამსახურები კიდევ ერთხელ შეისწავლიან სადავო საკითხებს. გარდა ამისა, მასვე მიაჩნია, რომ პოლიტიკური რეკლამის შინაარსთან დაკავშირებით მსგავსი ხასიათის დირექტივებს საქართველოს კანონმდებლობა არ სცნობს.

კომისიის თავმჯდომარის წერილს ცენზურის მცდელობად აფასებს ტელეკომპანია რუსთავი 2-ის იურისტი, თამთა მურადაშვილი. მისი თქმით, საარჩევნო პროცესში კომისია წარმოჩინდა, როგორც მხარე.

"კლიპების ეთერში გაშვება არა, მათი ეთერიდან ამოღება იქნება კანონის დარღვევა. სწორედ ამიტომაც რუსთავი 2 არ აპირებს შეწყვიტოს ამ კლიპების განთავსება", — განმარტავს ის.

საიას განმარტება

საქართველოს ახალგაზრდა იურისტთა ასოციაციის მედიის მიმართულების ხელმძღვანელი, მარიამ გოგოსაშვილი ამბობს, რომ წერილის შინაარსის შესრულება მაუწყებლებისთვის სავალდებულო არ არის, რადგან მასზე კომისიას არ უმსჯელია.

"თუ სარეკლამო რგოლით დარღვეულია კონკრეტული პირის უფლებები, მას შეუძლია სამართლებრივად იმოქმედოს დამკვეთის და არა მაუწყებლის მიმართ. კომისია არ არის უფლებამოსილი იმსჯელოს პოლიტიკური რეკლამის შინაარსზე", — განმარტა მან.

კომისიის მოსალოდნელი რეაგირება

კომისიიდან მაუწყებლებში გაგზავნილ წერილში აღნიშნული არ არის, რა სანქცია შეიძლება დაეკისროთ ტელევიზიებს ზურაბიშვილის საწინააღმდეგო კლიპების საეთერო ბადიდან არამოღების შემთხვევაში.

კომუნიკაციების კომისიის პრესსამსახურის თანამშრომლებმა უწყების შესახებ On.ge-ზე თვეების წინ გამოქვეყნებული კრიტიკული მასალის გამო ზეპირ კომენტარზე უარი თქვეს, წერილობით ტელევიზიებისთვის კი სამართალდარღვევათა ოქმის არშედგენა ასე განმარტეს:

"კომისიას კითხვით მიმართეს მაუწყებლებმა და კითხვის დასმაზე კომუნიკაციების კომისია სამართალდარღვევათა ოქმებს არ ადგენს".