პარლამენტის წევრის უმრავლესობიდან, გედევან ფოფხაძის თქმით, საკონსტიტუციო სასამართლომ მარიხუანის მოხმარების ლეგალიზებით მიიღო ანტისახელმწიფოებრივი და არასწორი გადაწყვეტილება. მისივე განმარტებით, ის ინსტიტუციურ დარტყმას აყენებს ქვეყნის სახელისუფლებო შტოების ფუნქციონირებას.

"ორგანოს, რომელსაც აქვს საკანონმდებლო საქმიანობა, ჩამოართვეს ამ გადაწყვეტილებით და მიიღეს გადაწყვეტილება, რომელიც არ შეიძლებოდა, რომ გამომდინარე ყოფილიყო კონსტიტუციიდან, რადგან ჩვენ ვართ იმ კონსტიტუციის ავტორები. ჩვენ მივეცით იმ კონსტიტუციას ხმა. იმ ჩანაწერში არც ერთი პარლამენტის წევრი არ ხედავს იმას, რაც დაინახა საკონსტიტუციო სასამართლომ", - თქვა გედევან ფოფხაძემ.

საკონსტიტუციო სასამართლოს 30 ივლისის გადაწყვეტილებით, მარიხუანის მოხმარება ლეგალური გახდა.

საქართველოს პარლამენტში შინაგან საქმეთა სამინისტრომ ორი კანონპროექტი წარადგინა, ერთი მარიხუანის მოხმარების რეგულირებას ეხება, ხოლო მეორე, კანაფის სამედიცინო მიზნით წარმოებასა და ექსპორტს.

აღნიშნულ კანონპროექტებს მართლმადიდებელი ეკლესიის მღვდელმსახურების კრიტიკა მოჰყვა. ეკლესიის წინააღმდეგობის გამო, საპარლამენტო უმრავლესობამ კანაფის ექსპორტის მიზნით წარმოების კანონპროექტის განხილვა გადაავადა, ხოლო მოხმარების რეგულირების შესახებ კანონპროექტის განხილვა არ შეუჩერებია.

საქართველოს პარლამენტმა საზოგადოებასა და ეკლესიას კანაფის ექსპორტის შესახებ კანონპროექტის განხილვაში ჩართვა შესთავაზა. დეკანოზმა შალვა კეკელიამ განაცხადა, რომ მართლმადიდებელი ეკლესია განხილვებში მონაწილეობას არ აპირებს.

საქართველოს საპატრიარქომ განცხადება გაავრცელა, სადაც აღნიშნა, რომ სრულიად მარლთმადიდებელი ეკლესია და მრევლი ეწინააღმდეგება ნებისმიერი მიზნისთვის მარიხუანის რეალიზაციის ლეგალიზებას.

გაიგე მეტი: