საქართველოს პარლამენტის იურიდიულ საკითხთა კომიტეტის თავმჯდომარე, ეკა ბესელია სასულიერო პირის კრიტიკას გამოეხმაურა და განაცხადა, რომ "ეკლესიის წინააღმდეგ არც ერთი გადაწყვეტილება მიღებული არ ყოფილა საქართველოს პარლამენტში".

ერთ-ერთმა სასულიერო პირმა ეკა ბესელიას უთხრა, რომ როცა კონსტიტუციაზე მუშაობდნენ უნდა დაეჯერებინათ მართლმადიდებელი ეკლესიისთვის და მთავარ საკანონმდებლო დოკუმენტში უნდა შეეტანათ ჩანაწერი, რომ ყველა ნარკოტიკი აკრძალულია. აღნიშნული ცვლილების კონსტიტუციაში შეტანას სასულიერო პირები ახლაც ითხოვენ. ამ იდეით მათ უკვე მიმართეს იურიდიულ საკითხთა კომიტეტის თავმჯდომარეს ეკა ბესელიას.

ეკა ბესელიას განცხადებით, კონსტიტუციაზე მუშაობის დროს, საკითხები მათ შორის საპატრიარქოსთან კონსულტაციით გაიარეს.

"მე პირადად მქონდა შეხვედრა პატრიარქთან. მას შემდეგ მივიღეთ ჩვენ გადაწყვეტილება, როცა ჩავწერეთ ქორწინების დეფინიცია საქართველოს კონსტიტუციაში და ჩვენ ვიყავით ამის ინიციატორი", — განაცხადა ეკა ბესელიამ.

დეპუტატმა საკონსტიტუციო სასამართლოს გადაწყვეტილებას ისაუბრა, რომლის თანახმადაც მარიხუანის მოხმარება დასჯადი აღარაა და განმარტა, რომ საპარლამენტო უმრავლესობა წინააღმდეგი იყო ამ გადაწყვეტილების.

"საკონსტიტუციო სასამართლოში ჩვენი პარლამენტის სახელით გამოდიოდნენ იურისტები, რომლებიც იყვნენ პარლამენტის სახელით მოპასუხეები. ჩვენ არ დაგვიჭერია მხარი იმ მოთხოვნისთვის, რომელიც სასამართლოში სარჩელის სახით იყო წარდგენილი. როდესაც თქვენ ამბობთ, რომ ეს პატრიის თავმჯდომარესთან შეთანხმებული გადაწყვეტილება იყო, არასწორი პოზიციაა", — განაცხადა ეკა ბესელიამ.

საქართველოს პარლამენტის იურიდიულ საკითხთა კომიტეტში პირველი მოსმენით განიხილავენ კანონპროექტს მარიხუანის მოხმარების რეგულაციების შესახებ. ახალი საკანონმდებლო რეგულაციები მას შემდეგ შემუშავდა, რაც საქართველოს საკონსტიტუციო სასამართლოს გადაწყვეტილებით მარიხუანის მოხმარება დასჯადი ქმედება აღარ არის.