უკრაინის პრეზიდენტის, პეტრო პოროშენკოს გადასახადებისგან თავის არიდებაში ადანაშაულებენ.

პანამის დოკუმენტების მიხედვით, პოროშენკომ 2014 წლის აგვისტოში მის მფლობელობაში არსებული ტკბილეულის ბიზნესი, Roshen-ი ბრიტანეთის ვირჯინიის კუნძულზე გადაიტანა.

სხვადასხვა იურისტები და საგადასახადო ადვოკატები აცხადებენ, რომ პოროშენკოს ეს ქმედება კანონს არ ეწინააღმდეგება და შესაბამისად, პრეზიდენტის მიმართ პრეტენზიები უსაფუძვლოა.

უკრაინის გენერალურმა პროკურატურამ განაცხადა, რომ წინასწარი მოკვლევის შედეგად დანაშაულებრივი ქმედება არ გამოვლენილა.

თუმცა, პოროშენკოს მოწინააღმდეგეთა თქმით, 2014 წლის აგვისტოში, მაშინ როდესაც ქვეყანა ეკონომიკური კრიზისის წინაშე იდგა და რუსეთთან ომობდა, ბიზნესის ოფშორში გადატანა არა ეთიკური და პოლიტიკურად გაუმართლებელი ნაბიჯი იყო.

თავად პოროშენკო აღნიშნულს ტვიტერზე გამოეხმაურა:

"ვთვლი, რომ შეიძლება პირველი უმაღლესი ოფიციალური პირი ვარ უკრაინაში, რომელიც ქონების დეკლარირებას, გადასახადების გადახდასა და ინტერესთა კონფლიქტებს სერიოზულად ეპყრობა." - წერს პოროშენკო.

ჟურნალისტებისთვის ხელმისაწვდომი გახდა იურიდიული ფირმა მოსაკ ფონსეკას საიდუმლო დოკუმენტები. 11 მილიონ საბუთში ცხადად ჩანს, თუ როგორ იყენებდნენ მსოფლიოს ცნობილი პოლიტიკოსები და ბიზნესმენები ე.წ. საგადასახადო სამოთხეებს (ოფშორულ ზონებს) ფულის გასათეთრებლად და გადასახადებისგან თავის ასარიდებლად. გამოჟონილი დოკუმენტების რაოდენობა კოლოსალურია.

იურიდიული ფირმის შიდა ბაზიდან 2.6 ტერაბაიტის მოცულობის 11.5 მილიონი დოკუმენტია ამოღებული, რაც ბევრად მეტია, ვიდრე 2010 წლის ვიკილიქსის ან 2013 წლის სნოუდენის დოკუმენტები.