არაერთი ქვეყნის ბრალდების მიუხედავად, რუსეთის საგარეო საქმეთა მინისტრი, სერგეი ლავროვი ამბობს, რომ რუსეთი სხვა სახელმწიფოების შიდა საქმეებში არ ერევა. ამის შესახებ მან სლოვაკურ გამომცემლობა პრავდასთან ინტერვიუში განაცხადა.

"ეს ჩვენი მეთოდი არაა. სხვათა შორის, აქ ჩვენი პრინციპული განსხვავებაა იმ ქვეყნებისგან, რომლებისთვისაც მსგავსი პრაქტიკა საკუთარი გეოპოლიტიკური ინტერესების გასატარებლად საყვარელი ინსტრუმენტია".

რუსეთი შიდა საქმეებში ჩარევაში არაერთ ქვეყანას დაუდანაშაულებია. ივლისში საბერძნეთმა რუსეთი ქვეყნის საქმეებში ჩარევაში დაადანაშაულა და ორი რუსი დიპლომატი გააძევა. საქმე ეხება საბერძნეთი-მაკედონიის შეთანხმებას, რომლის მიხედვითაც მაკედონიას "ჩრდილოეთ მაკედონიის რესპუბლიკა" დაერქმევა. სახელის შეცვლის სანაცვლოდ კი საბერძნეთი ევროკავშირსა და ნატოსკენ მაკედონიის სვლას ხელს არ შეუშლის. საბერძნეთი აცხადებდა, რომ რუსეთი ამ შეთანხმების ჩაშლას ცდილობდა.

აშშ-ში 2016 წლის საპრეზიდენტო არჩევნებში რუსეთის ჩარევას იძიებენ. კონგრესის რამდენიმე კომიტეტი ამერიკის საპრეზიდენტო არჩევნებში რუსეთის ჩარევის საკითხს უკვე თვეებია იძიებს. აშშ-ის დაზვერვის სამსახურები ასკვნიან, რომ ეს პროცესი უშუალოდ რუსეთის პრეზიდენტის მიერ იყო მართული იმ მიზნით, რომ არჩევნებში დონალდ ტრამპს მისი დემოკრატი მეტოქე, ამერიკის ყოფილი სახელმწიფო მდივანი ჰილარი კლინტონი დაემარცხებინა.

გამოძიების ვერსიით, არჩევნებზე ზეგავლენისთვის რუსეთი ფეისბუქის ყალბ ანგარიშებსა და გვერდებს იყენებდა, რომლებსაც ტროლების ფაბრიკა მართავს. ჰაკერული თავდასხმის ბრალდებით რუსეთის რამდენიმე მოქალაქეს, მათ შორის, ბიზნესმენებს, ბრალი წაუყენეს.

რუსეთის ჩარევაზე გაეროში დიდი ბრიტანეთის მუდმივმა წარმომადგენელმა, ჯონათან ალენმაც ისაუბრა. ალენმა უშიშროების საბჭოს სხდომაზე სოლსბერიში ყოფილი რუსი ჯაშუშისა და მისი შვილის ქიმიური ნივთიერებით მოწამვლაზე ისაუბრა.

"რუსეთი სხვა ქვეყნების შიდა საქმეებში დიდი ხანია ერევა, მათ შორის, მონტენეგროში გადატრიალების წარუმატებელი მცდელობა, სხვა სახელმწიფოებზე მუდმივი კიბერშეტევები ან დემოკრატიულ პროცესებზე გავლენის მცდელობები. რუსეთს საერთაშორისო სამართლის დარღვევის დიდი ისტორია აქვს, ყველაზე თვალსაჩინო მაგალითებს ჩვენ ვხედავთ ყირიმსა და საქართველოში", - განაცხადა ჯონათან ალენმა.