ქართული ოცნების პოლიტსაბჭოს თავმჯდომარემ, ბიძინა ივანიშვილმა განაცხადა, რომ ჯერ არ იცის ვის დაუჭერს მხარს ქართული ოცნება საპრეზიდენტო არჩევნებზე. TV პირველი კითხვაზე - დაუჭერენ თუ არა მხარს სალომე ზურაბიშვილის კანდიდატურას ივანიშვილი პასუხობს:

"ჯერ არ ვიცი. რაც იქნება, იქნება. გვარებს ვარჩევთ და გეტყვით".

იდეა, რომ ქართულ ოცნებას საპრეზიდენტო კანდიდატი არ ჰყავდეს ბიძინა ივანიშვილს ეკუთვნის. მან პირველ არხთან ინტერვიუში განაცხადა, რომ ეს პოზიცია კონსულტაციების დაწყების პირველი დღიდან ჰქონდა.

თბილისის მერმა, კახა კალაძემ განმარტა, რომ დაახლოებით 10 სექტემბრისთვის გაასაჯარივებენ იმ საპრეზიდენტო კანდიდატის ვინაობას, ვისაც მმართველი პარტია ქართული ოცნება მხარს დაუჭერს. კალაძე ამბობს, რომ მათ მიერ მხარდაჭერილი პირი აუცილებლად უპარტიო იქნება.

გავრცელებული ინფორმაციით, ქართულმა ოცნებამ არჩევნებში მხარი შესაძლოა დამოუკიდებელ კანდიდატს სალომე ზურაბიშვილს დაუჭიროს, თუმცა მამუკა ბახტაძემ განაცხადა, რომ გუნდში არსებობს პოზიცია საპრეზიდენტო კანდიდატის აუცილებლად დაყენებასთან დაკავშირებით.