დღეს, 26 აგვისტოს თბილისის მერმა, კახა კალაძემ ჟურნალისტებთან საუბრისას განმარტა, რომ დაახლოებით 10 სექტემბრისთვის გაასაჯარივებენ იმ საპრეზიდენტო კანდიდატის ვინაობას, ვისაც მმართველი პარტია ქართული ოცნება მხარს დაუჭერს. კალაძე ამბობს, რომ მათ მიერ მხარდაჭერილი პირი აუცილებლად უპარტიო იქნება:

"ჩვენ არ გვყავს საპრეზიდენტო კანდიდატი, თუმცა პარტია მიიღებს გადაწყვეტილებას, თუ რომელ კანდიდატს დაუჭიროს მხარი. ცალსახაა ერთი რამ, რომ ის უნდა იყოს ყველა შემთხვევაში არაპარტიული. სალომეც დამოუკიდებელი კანდიდატია და ვნახავთ, მივიღებთ გადაწყვეტილებას".

იდეა, რომ ქართულ ოცნებას საპრეზიდენტო კანდიდატი არ ჰყავდეს, პარტიის თავმჯდომარეს ბიძინა ივანიშვილს ეკუთვნის. მან პირველ არხთან ინტერვიუში განაცხადა, რომ ეს პოზიცია კონსულტაციების დაწყების პირველი დღიდან ჰქონდა.

ბიძინა ივანიშვილს დაეთანხმა საქართველოს პრემიერ-მინისტრი მამუკა ბახტაძე და განაცხადა, რომ უფრო დემოკრატიული იქნებოდა, თუ ქართულ ოცნებას საპრეზიდენტო არჩევნებში კანდიდატი არ ეყოლებოდა.

გავრცელებული ინფორმაციით, ქართულმა ოცნებამ არჩევნებში მხარი შესაძლოა დამოუკიდებელ კანდიდატს სალომე ზურაბიშვილს დაუჭიროს, თუმცა მამუკა ბახტაძემ განაცხადა, რომ გუნდში არსებობს პოზიცია საპრეზიდენტო კანდიდატის აუცილებლად დაყენებასთან დაკავშირებით.