სტამბოლის ერთ–ერთი სკოლის მასწავლებელი, 42 წლის გოქან აჩიკოლუ მას შემდეგ დაიღუპა, რაც დაკავებისას თურქმა სამართალდამცავებმა ადეკვატური სამედიცინო მომსახურება არ გაუწიეს.

42 წლის მასწავლებელი გადატრიალების მცდელობასა და ფეტულა გიულენის ორგანიზაციასთან კავშირის ბრალდებით მიმდინარე წლის 23 ივლისს დააკავეს. ის დიაბეტით იყო დაავადებული. Hurriyet Daily News–ის ცნობით, ოჯახის წევრებს არ მისცეს საშუალება, აჩიკოლუსთვის მიეწოდებინათ მისი სიცოცხლისთვის აუცილებელი მედიკამენტები. მისი მდგომარეობა პირველად 28 აგვისტოს დამძიმდა, რის შემდეგაც საავადმყოფოში გადაიყვანეს, თუმცა, მალევე დააბრუნეს იზოლატორში. ბრალდებული მასწავლეებლი მოგვიანებით ისევ ცუდად გახდა და 5 აგვისტოს საავადმყოფოში დაიღუპა.

თურქული მედიის ცნობით, ახლობლებს არ მისცეს საშუალება, გოქან აჩიკოლუ სტამბოლში, მუსლიმური წესის მიხედვით დაეკრძალათ. ოჯახს მხოლოდ ერთი გამოსავალი დაუტოვეს – მასწავლებელი ან სტამბოლში, ე.წ. მოღალატეთა სასაფლაოზე უნდა დაეკრძალათ, ან სადმე სხვაგან, შორს სტამბოლისგან. ოჯახმა მიიღო გადაწყვეტილება, რომ აჩიკოლუ ცენტრალურ თურქეთში, კონიაში გადაესვენებინა საკუთარი მანქანით, რადგან თურქეთის მთავრობამ დამკრძალავ ბიუროებს აუკრძალა ამბოხთან კავშირის მქონე პირებისთვის შესაბამისი სერვისის მიწოდება.

კონიაში მასწავლებლის დაკრძალვას 40–მდე უახლოესი ადამიანი ესწრებოდა, ოჯახმა ვერ შეძლო სასულიერო პირის მოძიება, რომელიც მას მუსლიმური წესის მიხედვით დაკრძალავდა.

2016 წლის 15 ივლისს თურქეთში სამხედრო გადატრიალების მცდელობა იყო. ბოლო მონაცემებით:

  • გარდაცვლილია 246 ადამიანი.
  • დაშავებულია 1400-ზე მეტი მოქალაქე.
  • დახურულია 130 მედია საშუალება.
  • გაცემულია 42 ჟურნალისტის დაკავების ორდერი.
  • სამსახურიდან გაშვებულია 66 ათასამდე საჯარო მოხელე.
  • გიულენთან კავშირის ბრალდებით თურქეთში ფეხბურთის 100-მდე მსაჯი გაათავისუფლეს.
  • ქვეყანაში სამთვიანი საგანგებო მდგომარეობაა გამოცხადებული.
  • აჯანყებასთან კავშირის ბრალდებით თანამდებობიდან გადააყენეს და დააკავეს ათასობით მოსამართლე, მასწავლებელი, მაღალი თანამდებობაზე მყოფი სამხედროები, პოლიციელები და სამოქალაქო პირები.
  • ხელისუფლებისთვის საეჭვო ჟურნალისტებს პრევენციის მიზნით გაუუქმეს პასპორტები.