ამერიკის კინოაკადემიამ გასულ წელს ახალი პრეზიდენტი, ჯონ ბეილი აირჩია. ახალი პრეზიდენტის მოსვლიდან ერთი წლის შემდეგ კი, ოსკარის ცერემონია მნიშვნელოვანი ცვლილებების მოლოდინშია.

ცოტა ხნის წინ გავრცელებული განცხადების თანახმად, 2019 წლიდან ოსკარს ახალი კატეგორია - წლის ყველაზე პოპულარული ფილმი ემატება.

აკადემიის ამ გადაწყვეტილებას არაერთგვაროვანი რეაქციები მოჰყვა. ჟურნალისტების ნაწილი მიესალმება ახალ კატეგორიას, ნაწილი კი თვლის, რომ ეს ყველაფერი მხოლოდ ისეთი ბლოკბასტერებისთვის გააკეთეს, როგორებიც არის შავი პანტერა, ვანდერ ვუმენი და სხვა, მაღალშემოსავლიანი კინოსურათები.

ამ ეტაპზე უცნობია, თუ როგორ მოხერხდება ახალ კატეგორიაში კონკრეტული ფილმის შერჩევა, იქნება ეს დამოკიდებული შემოსავალზე თუ სხვა რომელიმე დეტალზე.

კიდევ ერთი სიახლეა, რომელიც ოსკარის დაჯილდოებას შეეხო, ეს მისი ხანგრძლივობაა და ის სამ საათამდე შემცირდა.

აკადემიის განცხადებაში ვკითხულობთ, რომ მაყურებლისთვის ასე უფრო კომფორტული იქნება ცერემონიის ყურება. დროის შემცირება კი რამდენიმე კატეგორიის ხარჯზე მოხდება, რომელთა გადაცემაც რეკლამების დროს მოხდება.

ჟურნალისტები ამ გადაწყვეტილებასაც კრიტიკით შეხვდნენ და თვლიან, რომ ეს არასამართლიანია, რადგან რეკლამების დროს გადაცემული ნომინაციებიც ისეთივე მნიშვნელოვანია, როგორც სხვა დანარჩენი.

გარდა ამისა, აკადემიამ წინასწარ გამოაცხადა 2020 წლის ოსკარის თარიღიც. ოსკარის რიგით 92-ე დაჯილდოების ცერემონია 2020 წლის 9 თებერვალს ჩატარდება, რაც ისტორიაში ყველაზე ადრეული რიცხვია.

რაც შეეხება 2019 წლის ოსკარის, ის 24 თებერვალს გაიმართება.