ამერიკის კინემატოგრაფიული ხელოვნებისა და მეცნიერების აკადემიის ამჟამინდელ პრეზიდენტ შერილ ბუნ აიზეკსს, რომელიც 2013 წელს აირჩიეს, უფლებამოსილება უკვე ამოეწურა, გუშინ კი ახალი პრეზიდენტის არჩევნებიც ჩატარდა, რომელშიც ჯონ ბეილიმ გაიმარჯვა.

74 წლის ბეილი უკვე წლებია, რაც ჰოლივუდში ერთ-ერთი წამყვანი ოპერატორია, რომელმაც 2014 წელს ოპერატორთა გაერთიანებისგან სფეროში შეტანილი წვლილისთვის ჯილდოც კი მიიღო.

სანამ მას აკადემიის პრეზიდენტად აირჩევნდნენ, 14 წლის განმავლობაში გამგეობის წევრიც იყო.

შეგახსენებთ, რომ ამერიკის კინოაკადემიამ ცოტა ხნის წინ 774 ახალი წევრი დაიმატა, მათ შორის არიან: აიშვარია რაი, მონიკა ბელუჩი, ამანდა სეიფრიდი, ემი პოლერი, კრის ჰემსვორტი, კრის პრატი, დუეინ ჯონსონი, ედგარ რამირესი, კრისტენ სტიუარტი, რუთ ნეგა, სარა პოლსონი, ვიგო მორტენსენი, ზაქარი ქუინტო, ადამ დრაივერი, კრის ევანსი, ფან ბინგბინგი, გალ გადოტი, შარლოტა გინსბურგი, რუპერტ გრინტი, ნაომი ჰარისი, ნიკ კეივი და ქართველი რეჟისორი ნანა ჯორჯაძე.

ამერიკის კინემატოგრაფიული ხელოვნებისა და მეცნიერების აკადემია, რომელიც კინოს ყველაზე პრესტიჟულ ჯილდოს ოსკარს გასცემს, 8 ათასზე მეტი წევრი ჰყავს, რომელთა უმეტესობა აშშ-ში მოღვაწეობს.