რუსეთის პრეზიდენტის პრეს-სპიკერმა დიმიტრი პესკოვმა სატალეფონო კონფერენციაზე ჟურნალისტებს განუცხადა, რომ პანამის დოკუმენტების საქმეში ვლადიმერ პუტინის ხსენება დეზინფორმაციას და მისთვის ჩირქის მოცხებას ემსახურება, რაც დასავლური პუტინოფობიითა გამოწვეული.

"ამ დეზინფორმაციის მთავარი სამიზნე ჩვენი პრეზიდენტია, განსაკუთრებით კი მომავალი საპარლამენტო არჩევნების, ხოლო უფრო შორეულ პერსპექტივაში - მომავალი საპრეზიდენტო არჩევნების კონტექსტში." - განაცხადა პესკოვმა.

მისი თქმით, პუბლიკაციებში არაფერი ახალი და საფუძვლიანი არ თქმულა ვლადიმერ პუტინის შესახებ.

"პუტინოფობია უკვე იმ დონემდე მივიდა, რომ რუსეთზე კარგის თქმა და რუსეთის მიერ გაკეთებული კარგი საქმეების აღნიშვნა ტაბუდ იქცა. მაგრამ აუცილებელია ცუდი რაღაცების თქმა და თუ არაფერია სათქმელი, მაშინ თემები ხელოვნურად იქმნება. ეს ჩვენთვის ცხადზე ცხადია" - აღნიშნა მან.

ჟურნალისტებისთვის ხელმისაწვდომი გახდა იურიდიული ფირმა მოსაკ ფონსეკას საიდუმლო დოკუმენტები. 11 მილიონ საბუთში ცხადად ჩანს, თუ როგორ იყენებდნენ მსოფლიოს ცნობილი პოლიტიკოსები და ბიზნესმენები ე.წ. საგადასახადო სამოთხეებს (ოფშორულ ზონებს) ფულის გასათეთრებლად და გადასახადებისგან თავის ასარიდებლად. გამოჟონილი დოკუმენტების რაოდენობა კოლოსალურია.

იურიდიული ფირმის შიდა ბაზიდან 2.6 ტერაბაიტის მოცულობის 11.5 მილიონი დოკუმენტია ამოღებული, რაც ბევრად მეტია, ვიდრე 2010 წლის ვიკილიქსის ან 2013 წლის სნოუდენის დოკუმენტები.

დოკუმენტებში რუსეთის ფედერაციის პრეზიდენტს, ვლადიმერ პუტინს ოფშორულ ზონებში $2 მილიარდი აშშ დოლარი აღმოუჩინეს.