ჯეს ვეიდი ახალგაზრდა მკვლევარია, რომელსაც მეცნიერებაში ახალი აღმოჩენების გაკეთების გარდა კიდევ ერთი დიდი მიზანი აქვს - მსოფლიოს ის ქალი მეცნიერები გააცნოს, რომელთა მიღწევებიც საზოგადოებისთვის უცნობია.

ამისთვის ის ვიკიპედიაში მათ შესახებ გვერდებს ხსნის. მხოლოდ 2017 წელს ჯესიმ 270 ქალზე შეიტანა ინფორმაცია.

ჯესი სადოქტორო კვლევაზე მუშაობს ლონდონის კოლეჯის ლაბორატორიაში:

"თავს ვთხოვ, რომ დღის განმავლობაში ერთ მეცნიერზე მაინც შევიტანო ინფორმაცია ვიკიპედიაში, მაგრამ ეს იმდენად ჩამთრევი საქმეა, ხანდახან დღეში სამ მეცნიერზეც ვწერ", - უთხრა მან Guardian-ს.

ჯესი ფიქრობს, რომ მეცნიერების კარი გოგოებისთვის და ბიჭებისთვის თანაბრად ღია არაა, რის გამოც, ცვლილებები შიგნიდან უნდა დაიწყოს.

"ვიკიპედია იდეალური ადგილია სწავლის მოყვარული ადამიანების დასაინტერესებლად. რაც უფრო მეტს კითხულობ ამ საოცარ მეცნიერ ქალებზე, მით უფრო მოტივირებული ხდები, რადგან მათი პერსონალური ისტორიები ნამდვილად შთამაგონებელია", - ამბობს ის.

როდესაც ჯესიმ მეცნიერების შესწავლა დაიწყო, აღმოაჩინა, რომ მის გარშემო სტუდენტების უმრავლესობას ბიჭები შეადგენდნენ. სტატისტიკური მონაცემების მიხედვით, ტექნოლოგიისა და ინჟინერიის მიმართულებით მსწავლელთა მხოლოდ 9%-ს შეადგენდნენ გოგოები.

ჯესი ვეიდის თქმით, უამრავი ფული იხარჯება გოგოების წასახალისებლად, რომ ტექნიკური მიმართულებებით დაინტერესდნენ, თუმცა მათი უმრავლესობის შინაარსი არაეფექტიანია.

"უამრავი ენერგია, ენთუზიაზმი და ფული იხარჯება ამ ინიციატივებში, თუმცა ისინი არ მუშაობენ. და ყველაზე საოცარი ისაა, რომ ისინი მტკიცებულებებზე და სხვა ქალების გამოცდილებებზე არ ყვებიან", - ამბობს ის.

პირველი ქალი მეცნიერი, რომლის შესახებაც ჯესიმ დაწერა, კლიმატურ ცვლილებების მკვლევარი კიმ კობი იყო. მეორე კი, ჟურნალ ნეიშენალ ჯეოგრაფიკის პირველი ქალი რედაქტორი სიუზან გოლდბერგი, რომელიც მარჯანზე კვლევებს ატარებდა.

ეს ყველაფერი არაა. მას შემდეგ, რაც მან 2017 წელს გამოცემული წიგნი Inferior წაიკითხა, რომელშიც გენდერულ სტერეოტიპებზე და იყო მოთხრობილი, მათი 70 ასლი შეიძინა და მეგობრებს და ახლობლებს აჩუქა.

ამის შესახებ, წიგნის ავტორმა ანჯელა სეინიმაც გაიგო, რის შემდეგაც მან ჯესის დაურეკა და უთხრა, რომ წიგნების ყიდვა უნდა შეეწყვიტა და 10 ხელმოწერილი წიგნი გაუგზავნა.

"რისი მიღწევის იმედი მაქვს? მინდა მეცნიერება უკეთესი სფერო და ადგილი იყოს ყველა იმ ადამიანისთვის, ვინც იქ მუშაობს და მუშაობდა. გოგოებმა უნდა იცოდნენ, რომ მათ დააფასებენ, თუ ამ სფეროში ჩაერთვებიან. როცა სექსისტური გარემო შეიცვლება, გოგოები მეცნიერებით მეტად დაინტერესდებიან", - ამბობს ჯესი.