საქართველოში რეფინანსირების განაკვეთზე მიბმული ყველა სესხი 25 საბაზისო ერთეულით შემცირდა და 7 პროცენტს გაუტოლდა. ეს იმას ნიშნავს, რომ რამდენიმე ათას ადამიანს, რომელსაც რეფინანსირების განაკვეთზე აქვს სესხი მიბმული პროცენტი შეუმცირდება. ეს გადაწყვეტილება საქართველოს ეროვნული ბანკის მონეტარული პოლიტიკის კომიტეტმა დღეს, 25 ივლისს მიიღო.

თუ არ გახსოვთ, არის თუ არა თქვენი სესხი რეფინანსირების განაკვეთზე მიბმული, შეგიძლიათ ჩახედოთ ბანკთან დადებულ ხელშეკრულებას, ან თავად სესხის გამცემ ორგანიზაციას ჰკითხოთ.

ეროვნულ ბანკში რეფინანსირების შემცირების გადაწყვეტილება ინფლაციის მაჩვნებელის შემცირების გამო მიიღეს.

"2018 წლის დასაწყისში ინფლაციის მაჩვენებელი შემცირდა და, პროგნოზების შესაბამისად, წლის პირველ ნახევარში მიზნობრივი დონის (3%) ფარგლებში ნარჩუნდება. ივნისში წლიურმა ინფლაციამ 2,2 პროცენტი შეადგინა, რაც ახლოს არის მიზნობრივ მაჩვენებელთან", - აღნიშნულია ეროვნული ბანკის მიერ გავრცელებულ განცხადებაში.

საქართველოში რეფინანსირების განაკვეთი 2017 წლის 13 დეკემბერს 7 პროცენტიდან 7,25 პროცენტამდე გაიზარდა.