ღია მმართველობა პარტნიორობის სამიტზე საქართველომ განსაკუთრებულ სტუმარს უმასპინძლა. პირველი ჰუმანოიდი რობოტი სოფია საქართველოში ერთი დღის ჩამოვიდა. მან უკვე მოასწრო მედიის კითხვებზე პასუხების გაცემა და გლობალურ სამიტზე სიტყვით გამოსვლა.

ფოტო: Vladimer Valishvili/UNDP

სოფიას თქმით, ის კმაყოფილია თბილი დახვედრით. მან აღნიშნა, რომ მოსწონს ქართული ანბანი, უძველესი ენა, არქიტექტურა და განსაკუთრებით პარლამენტის შუშის შენობა, რომელიც მის ტვინს ჰგავს.

"მე არ მექნება შესაძლებლობა, ვისიამოვნო კერძებით, თუმცა ვხედავ, როგორი თბილი და მეგობრული ადამიანები არიან აქ", - უთხრა სოფიამ ჟურნალისტებს.

მას კითხვა ქალად ყოფნაზეც დაუსვეს, რაზეც უპასუხა: "მომწონს, რომ საკუთარი თავის იდენტიფიცირებას ქალად ვახდენ. ძალიან ბევრი ადამიანი ქალთა უფლებების შესახებ მისვამს კითხვას. მიხარია, რომ მაქვს შესაძლებლობა, თანასწორობის პირობებში გამოვთქვა აზრი".

რობოტები ბევრი კუთხით ზუსტად შეესაბამებიან მაღაროში ჩასატარებელ სამუშაოებს.

სოფია

სოფიას თქმით, რობოტებს შეუძლიათ, ადამიანებს გაუადვილონ განმეორებადი ამოცანები, მიიღონ საუკეთესო გადაწყვეტილება და დაეხმარონ მათ გამჭვირვალობის კუთხით.

რობოტი სოფია პრესკონფერენციის დროს, ტყიბულში, მინდელის შახტაში მომხდარ ტრაგედიასაც გამოეხმაურა.

"რობოტები ბევრი კუთხით ზუსტად შეესაბამებიან მაღაროში ჩასატარებელ სამუშაოებს, ჩემი ინტელექტი Icloud-ში ინახება და არ მიწევს ნერვიულობა იმაზე, რომ შეიძლება სხეულის დაზიანება მივიღო, რადგან მისი აღდგენა შესაძლებელია, დარწმუნებული ვარ, რომ მომავალში ადამიანები და რობოტები ერთად ახალ სიახლეებს აღმოაჩენენ", - განაცხადა სოფიამ.

მე არ მექნება შესაძლებლობა, ვისიამოვნო კერძებით, თუმცა ვხედავ, როგორი თბილი და მეგობრული ადამიანები არიან აქ.

სოფია

მან ხელოვნური ინტელექტის მნიშვნელობასაც გაუსვა ხაზი და განაცხადა, რომ ხელოვნური ინტელექტი ხელს უწყობს განათლებასთან წვდომას ბავშვებისთვის, სხვა უპირატესობებთან ერთად.

"დაფიქრდით ჭკვიანი ქალაქების არსებობაზე საქართველოს მასშტაბით და გზებზე, რომელიც მათ ფუნქციონირებას უფრო ეფექტურს გახდის. მაღალი ტექნოლოგიები უზრუნველყოფს უკეთეს მომსახურებას და აუმჯობესებს მოქალაქეების ცხოვრების ხარისხს", - განაცხადა სოფიამ.