ზაფხულის დადგომასთან ერთად იზრდება მწერებისა და პარაზიტების რაოდენობაც და სამწუხაროდ, სადაც არ უნდა წავიდეთ, ამ საზიზღარი, პატარა არსებების ყურადღებას თითქმის ყოველთვის და ყველგან ვიქცევთ.

გაინტერესებთ, რა შეიძლება იყოს მწველი მზის სხივებზე აუტანელი?! რა თქმა უნდა, კოღოს ნაკბენი, რომელიც ღამე არ გვაძინებს, სივდება და ქავილის შეგრძნებას იწვევს.

თუმცა რაც გვკბენს, ყველაფერი კოღო არ არის და ინფექციური დაავადებებისა და ალერგიის თავიდან ასაცილებლად აუცილებელია, რომ სხვადასხვა მწერის ნაკბენის ეთმანეთისგან კარგად გარჩევა შეგვეძლოს.

აი ისინიც:

1. კოღოს ნაკბენი

ფოტო: Skin Care

კოღოს კბენის შემდეგ, რომ არა აუტანელი ქავილის შეგრძნება, სხეულზე გაჩენილი სიწითლე და შესიებაც მარტივად მიიქცევდა თქვენს ყურადღებას. როგორც წესი, დაზიანება მალევე ქრება, მაგრამ არსებობს შედარებით მძიმე შემთხვევებიც, როდესაც აუტანელი წვისა და სისუსტის შეგრძნება გვაწუხებს, ასეთ შემთხვევაში უმჯობესია ექიმს მიაკითხოთ.

2. კრაზანის ან ფუტკრის ნაკბენი

ფოტო: Wasp

ადამიანისთვის კრაზანის ან ფუტკრის ნაკბენი მხოლოდ ერთ შემთხვევაში წარმოადგენს საფრთხეს, თუ მას ალერგია აქვს. ასეთ შემთხვევაში აუცილებელია, რომ თავდაპირველად შხამიანი ნესტარი მოიცილოთ, შემდეგ კი ექიმს მიმართოთ.

3. რწყილის ნაკბენი

ფოტო: Wikimedia

რწყილის ნაკბენიც საკმაოდ მარტივად შესამჩნევია, რადგან სხეულის დაზიანებული უბანი წითელ შეფერილობას იღებს. ასეთ დროს აუცილებელია, რომ ქავილისა და ანთებითი პროცესის საწინააღმდეგო მალამო გამოიყენოთ, წინააღმდეგ შემთხვევაში, დიდი შანსია ინფექცია განვითარდეს.

4. ბუზის ნაკბენი

ფოტო: Success In The Workplace

ბუზის ზოგიერთი სახეობა ადამიანს არ ერჩის, თუმცა არსებობენ ისეთებიც, რომლებიც დიდი სიამოვნებით შეექცევიან ჩვენს სისხლს. ვინაიდან ამ მწერებს საკმაოდ დაბინძურებულ ადგილებში უყვართ ფრენა, დიდი შანსია, რომ მისმა ნაკბენმა ჯანმრთელობის სერიოზული პრობლემები შეგიქმნათ.

5. ობობას ნაკბენი

ფოტო: Pinterest

ობობას ნაკბენი ყველაზე მარტივად შესამჩნევია, რადგან თუ გაგიმართლათ და შხამიანი არ არის, სხეულზე შრამის სახით ის ორ პატარა წერტილს ტოვებს. აღსანიშნავია, რომ ობობების უმრავლესობა სრულიად უვნებელია, თუმცა თუ მისი ნაკბენის შემდეგ ამჩნევთ, რომ სიმპტომები საგანგაშოა, აუცილებლად მიაკითხეთ ექიმს.

ამავე თემაზე დღეს, 17 ივლისს "სხვა შუადღის" ეთერში გაცილებით ვრცლად ისაუბრეს, სადაც წამყვანები სტუმრებთან ერთად სხვადასხვა მწერის ნაკბენსა და კბენის შემდეგ ჯანმრთელობის შესაძლო გაუარესების შემთხვევებს განიხილავდნენ.