დიდი ბრიტანეთის პრემიერ-მინისტრმა ტერეზა მეიმ განაცხადა, რომ აშშ-ის პრეზიდენტმა, დონალდ ტრამპმა ურჩია ევროკავშირს უჩივლოს. ამის შესახებ მეიმ BBC-ს განუცხადა.

რამდენიმე დღის წინ დიდი ბრიტანეთში ვიზიტისას, ერთობლივ პრესკონფერენციაზე დონალდ ტრამპმა განაცხადა, რომ ტერეზა მეის რჩევა მისცა, თუმცა პრემიერმა ის ზედმეტად რადიკალურად მიიჩნია.

"მან მითხრა, რომ სჯობს ევროკავშირს ვუჩივლო და არა მოლაპარაკებები ვაწარმოო", - განაცხადა მეიმ ინტერვიუს დროს.

ინტერვიუს განმავლობაში ტერეზა მეიმ კიდევ ერთხელ განაცხადა, რომ "ბრექსიტის" მისი გეგმა საშუალებას მისცემს ქვეყანას სავაჭრო შეთანხმებები იქონიოს სხვა ქვეყნებთან, აკრძალოს სამუშაო ძალის თავისუფლად გადაადგილება და ქვეყანა ევროკავშირის იურისდიქციიდან გამოიყვანოს.

ტერეზა მეისთან უთანხმოების გამო თანამდებობები დატოვეს "ბრექსიტის" საკითხებში მინისტრმა, დევიდ დევისმა და საგარეო საქმეთა მინისტრმა, ბორის ჯონსონმა. მათი განცხადებით, მთავრობა აპირებს გაატაროს "ბრექსიტი", რომელიც მოსახლეობას 2016 წლის რეფერენდუმით არ აურჩევია.

ინტერვიუზე ტერეზა მეიმ განაცხადა, რომ ტრამპმა, ასევე, ურჩია, ევროკავშირთან მოლაპარაკებების მაგიდა არ მიატოვოს.