NDI-ის კვლევის მიხედვით, გადაწყვეტილი ამომრჩევლის 35 პროცენტი აცხადებს, რომ შემდეგ საპარლამენტო არჩევნებზე მათ პოლიტიკურ გადაწყვეტილებაზე მნიშვნელოვან გავლენას მოახდენს მრევლისა და მღვდლის პოლიტიკური შეხედულებები. 15 პროცენტისთვის ეს ფაქტორი არც მნიშვნელოვანია და არც უმნიშნელო, ხოლო 44 პროცენტისთვის - უმნიშვნელოა.

რაც შეეხება გადაუწყვეტელ ამომრჩეველს, მრევლისა და მღვდლის მოსაზრებებს მნიშვნელობა ექნება 29 პროცენტისთვის, ხოლო მნიშვნელობა არ ექნება მათი 42 პროცენტისთვის.

გადაწყვეტილ ამომრჩეველთა 44 პროცენტის თქმით, მათ პოლიტიკურ გადაწყვეტილებაზე მნიშვნელოვანი გავლენა აქვს ოჯახისა და მეგობრების პოლიტიკურ შეხედულებებს, 36 პროცენტისთვის კი ამას არანაირი მნიშვნელობა არ აქვს.

რაც შეეხება გადაწყვეტილი ამომრჩელის 25 პროცენტს, მათ არჩევანზე მნიშვნელოვან გავლენას მოახდენს პოპულარული ადამიანების შეხედულებები, 21 პროცენტი ასეთ ფაქტორად დამსაქმებლისა და თანამშრომლების შეხედულებებს ასახელებს.

NDI-ის კვლევის საველე სამუშაოები CRRC- საქართველომ ჩაატარა 2016 წლის 8 ივნისიდან 6 ივლისის პერიოდში. სულ მომზადდა 4 113 დასრულებული ინტერვიუ. განხორციელდა წარმომადგენლობითი შერჩევა ქვეყნის მასშტაბით, ამასთან, დამატებითი წარმომადგენლობითი შერჩევა თბილისში, ქალაქისა და სოფლის ტიპის დასახლებებში, ეროვნული უმცირესობებით მჭიდროდ დასახლებულ რეგიონებში. კვლევის საშუალო ცდომილების ზღვარი არის +/- 2,1%.