ადამიანის უფლებათა სწავლებისა და მონიტორინგის ცენტრი (EMC) პროკურატურას მოუწოდებს, დროულად დაასრულოს გამოძიება ჭიათურაში პოლიციელთა მხრიდან შესაძლო ძალადობის საქმეზე.

ჭიათურაში, პოლიციის შენობასთან ადგილობრივები მე-17 დღეა შიმშილობენ. პოლიციის უფროსისა და მისი მოადგილის გადადგომის მოთხოვნით ჭიათურაში სამმა ახალგაზრდა კაცმა პირი ამოიკერა. ერთ-ერთი მოშიმშილის, ბექა ჭუმბურიძის ძმის თქმით, 26 მაისს კორპუსის წინ ქეიფისას ბიჭებთან ავტომატებით შეიარაღებული, არაფხიზელ მდგომარეობაში მყოფი პოლიციელები მივიდნენ, გამოიწვიეს ახალგაზრდები და ანგარიშწორება მოხდა.

EMC-ის განცხადებით, 26 მაისს მომხდარ ფაქტთან დაკავშირებით მიმდინარეობს გამოძიება, რომელმაც უნდა დაადგინოს, თუ რა უძღვოდა წინ აქციის მონაწილეებთან პოლიციელთა კომუნიკაციას. მათივე თქმით, პროკურატურამ უნდა გამოიძიოს პოლიციელთა მიერ დაკავებამდე და დაკავების შემდეგ აქციის მონაწილეთა მიმართ შესაძლო ძალადობის, კერძოდ, ფიზიკური შეურაცხყოფის შემთხვევებიც.

"EMC მოუწოდებს დასავლეთ საქართველოს საოლქო პროკურატურას, გამოძიება წარმართოს სწრაფად და გამჭვირვალედ და დროულად მიანიჭოს დაზარალებულებს სტატუსი, რათა მათ მიეცეთ საქმის მასალების გაცნობის შესაძლებლობა", - წერია განცხადებაში.