პოლიციის უფროსისა და მისი მოადგილის გადადგომის მოთხოვნით ჭიათურაში სამმა ახალგაზრდა კაცმა შიმშილობა დაიწყო და პირი ამოიკერა. პროტესტის მიზეზებზე ერთ-ერთი მოშიმშილის, ბექა ჭუმბურიძის ძმა, დათო ჭუმბურიძე On.ge-ს ესაუბრა.

მისი თქმით, შიმშილობა იმ დრომდე გაგრძელდება, სანამ მათი ორი მოთხოვნა პოლიციის თანამშრომლების გათავისუფლებასა და ერთ-ერთი დაკავებულისთვის წაყენებული მუხლის შეცვლის შესახებ არ დაკმაყოფილდება.

ჭუმბურიძე ამბობს, რომ 26 მაისის ღამეს ბიჭები თავიანთი კორპუსის წინ ქეიფობდნენ, რა დროსაც მათთან ავტომატებით შეიარაღებული არაფხიზელ მდგომარეობაში მყოფი პოლიციელები მივიდნენ. მისი თქმით, მათ გამოიწვიეს ახალგაზრდები და ამის გამო მოხდა ანგარიშსწორება.

შინაგან საქმეთა სამინისტროში აღნიშნავენ, რომ ჭიათურის რაიონული სამმართველოს უფროსის მოადგილეს, მიხეილ გიგაურს და ამავე სამმართველოს უბნის ინსპექტორ-გამომძიებელს ვეფხია შეყილაძეს, რომლებიც სამსახურებრივი მოვალეობის შესრულებისას, ადმინისტრაციული წესით დაკავებულმა ექვსმა პირმა წინააღმდეგობა გაუწია, ხოლო იმ ერთმა ხელი დაარტყა მიხეილ გიგაურს.

"ბრალდებულის ახლობლების მოთხოვნები მის გათავისუფლებასთან დაკავშირებით და პროტესტის გამოხატვის ფორმა მიუღებელია იმ ფონზე, როდესაც ბრალდებულის მიმართ არსებობს შესაბამისი მტკიცებულებები და მიმდინარეობს სისხლის სამართლის კანონმდებლობით გათვალისწინებული პროცედურები", - აცხადებენ უწყებაში.

შინაგან საქმეთა სამინისტრომ აღნიშნულ ფაქტზე გამოძიება საქართველოს სისხლის სამართლის კოდექსის 353-ე მუხლის პირველი ნაწილით დაიწყო. გამოძიება ჭიათურის რაიონული სამმართველოს თანამშრომლების მიმართ წინააღმდეგობის გაწევის საქმეზე დაიწყო. ბრალის დამტკიცების შემთხვევაში მას ორიდან ხუთ წლამდე თავისუფლების აღკვეთა ემუქრება.