საქართველოს პრეზიდენტმა, გიორგი მარგველაშვილმა ბათუმში კონფერენციაზე "საქართველოს ევროპული გზა" გიორგი კვირიკაშვილის საქმიანობა შეაფასა.

მისი თქმით, იმ თანამდებობის პირებიდან, რომელთანაც პრეზიდენტს უმუშავია, კვირიკაშვილი ყველაზე კომფორტული იყო, ნათლად განსაზღვრული ხედვით.

"გაჩნდა კითხვები, რატომ წავიდა კვირიკაშვილი თანამდებობიდან. მე ვერ ვიტყვი, რომ ეკონომიკა და კეთილდღეობა უმაღლეს დონეზეა, მაგრამ ვერც იმას ვიტყვი, რომ კვირიკაშვილის საქმიანობა წარუმატებელი იყო", - განაცხადა გიორგი მარგველაშვილმა.

მისი თქმით, საზოგადოება ერთი თვეა აქტიურად აფიქსირებს თავის პოზიციას სამართლიანობასთან და მართლმსაჯულებასთან მიმართებით, თუმცა მთავარ კითხვებს პასუხი მაინც არ გაეცა.

"ჩვენ გვაქვს რეალობა, რომ იუნისეფის კვლევიდან გამომდინარე კვირიკაშვილს ვერ აუგია ეკონომიკური პოლიტიკა და ამის გამო მიდის თანამდებობიდან. ყოველივე ეს და მათ შორის გუშინდელი გადადგომის მოხსენება სწორედაც, რომ ჩვენი ევროპული გამჭვირვალე და საზოგადოებისთვის გასაგები პოლიტიკის შემადგენელი ნაწილი უნდა გახდეს", - განაცხადა მარგველაშვილმა.

მისი თქმით, პრემიერ-მინისტრი წავიდა თანამდებობიდან და თქვა, რომ ბიძინა ივანიშვილს უნდა მისცეს საშუალება დააკომპლექტოს ახალი მთავრობა.

ქართული ოცნების მმართველობის პერიოდში მესამე პრემიერ-მინისტრმა გიორგი კვირიკაშვილმა გუშინ, 13 ივნისს პრემიერ-მინისტრის თანამდებობა დატოვა. საქართველოს კონსტიტუციის თანახმად, პრემიერის გადადგომასთან ერთად, მთავრობის შემადგენლობაც გადამდგარად ითვლება.

პრემიერ-მინისტრის გადადგომის შემდეგ, საქართველოს კონსტიტუციის მიხედვით, პრეზიდენტმა არსებულ მთავრობას დააკისრა ვალდებულება ახალი მთავრობის არჩევამდე თავისი მოვალეობა შეასრულოს. ამის შემდეგ, შვიდი დღის განმავლობაში, საპარლამენტო უმრავლესობამ პრეზიდენტს პრემიერ-მინისტრობის კანდიდატი უნდა შესთავაზოს, რომელსაც იგი უკვე პარლამენტს წარუდგენს განსახილველად. პრემიერ-მინისტრის კანდიდატი 14 ივნისს უმრავლესობის გაფართოებულ სხდომაზე გახდება ცნობილი.

ასევე შვიდდღიან ვადაში პრემიერ-მინისტრობის კანდიდატმა უნდა ჩამოაყალიბოს მთავრობის შემადგენლობა და პარლამენტს ნდობის მისაღებად უნდა წარუდგინოს. მან ასევე უნდა წარადგინოს სამთავრობო პროგრამაც.

ამის შემდეგ, კიდევ შვიდი დღის განმავლობაში, პარლამენტმა ეს ყველაფერი უნდა განიხილოს და კენჭი უყაროს. მაქსიმუმ 21 დღეში ახალი მთავრობა უნდა დაკომპლექტეს.

ამავე თემაზე: