საქართველოს პრემიერ-მინისტრის გიორგი კვირიკაშვილის განცხადებით, აშშ-ში საქართველოს წარმომადგენლობითი დელეგაციის ვიზიტის შედეგად, ორმხრივი სტრატეგიული ურთიერთობები სხვადასხვა განზომილებით მდიდრდება.

კვირიკაშვილის შეფასებით, რეგიონში საქართველოს პოზიციიდან და აშშ-თან ჩვენი ურთიერთობების განსაკუთრებული ხასიათიდან გამომდინარე, ერთმნიშვნელოვნად შეგვიძლია ვთქვათ, რომ საქართველოს მნიშვნელობა იზრდება.

"აშშ-ში ჩვენი ძალიან მნიშვნელოვანი ვიზიტი კონკრეტულ შედეგებსა და ნაბიჯებზე ორიენტირებული ძალიან მნიშვნელოვანი მოლაპარაკებებით აღინიშნა" - განაცხადა პრემიერმა აშშ-ში ვიზიტის შეფასებისას.

კვირიკაშვილმა აშშ-ს ვიცე-პრეზიდენტთან შეხვედრასა და მის პირად რეზიდენციაში სტუმრობის მნიშვნელობაზეც ისაუბრა. მისი თქმით, შეხვედრაზე საქართველოსთვის მნიშვნელოვანი ყველა საკითხი განიხილეს და ვიცე-პრეზიდენტისგან ყველა სასიცოცხლოდ მნიშვნელოვანი მიმართულებით მხარდაჭერა მიიღეს.

"ეს გახლავთ კონკრეტული ნაბიჯების გადადგმა, როგორც საქართველოს ნატოში ინტეგრირების, ასევე - სავაჭრო-ეკონომიკური ურთიერთობების გაღრმავების მიმართულებით და რა თქმა უნდა, - საქართველოს ტერიტორიული მთლიანობისა და სუვერენიტეტის მხარდაჭერა და ამ კუთხით საერთაშორისო ძალისხმევისა და აშშ-ის მაკონსოლიდირებელი როლის კიდევ უფრო გაძლიერება", - განმარტა პრემიერმა.

მისი თქმით, საქართველო იყო ერთ-ერთი პირველი ქვეყანა, რომელიც აშშ-ს სახელმწიფო მდივან მაიკ პომპეოს თანამდებობაზე დანიშვნის შემდეგ შეხვდა, რაც ასევე არის საქართველოსადმი განსაკუთრებული მხარდაჭერის გამოხატულება.

პრემიერის თქმით, სტრატეგიული პარტნიორობის კომისიის პლენარულ სხდომაზე ერთ-ერთი ყველაზე მნიშვნელოვანი გზავნილი იყო მოწოდება რუსეთს ფედერაციის მიმართ, რომ 2008 წლის ცეცხლის შეწყვეტის ხელშეკრულება აუცილებლად უნდა იყოს შესრულებული;

"დაფიქსირდა საქართველოს ნატოში ინტეგრაციის მიმართულებით კონკრეტული ნაბიჯების გადადგმის მზაობა. ეს ჩვენთვის კიდევ უფრო მნიშვნელოვანია ნატოს ბრიუსელის ივლისის სამიტის მოახლოების გათვალისწინებით და დიდი იმედი გვაქვს, ასევე კონკრეტული ნაბიჯები იქნება გადადგმული ამ მიმართულებით", - განაცხადა პრემიერმა.

პრემიერმა აშშ-ში გამართულ სხვა შეხვედრებზეც ისაუბრა, რომელიც სტრატეგიული პარტნიორობის, ვაჭრობისა და თავდაცვის საკითხებს ეხებოდა. მან ვიზიტს ძალიან წარმატებული უწოდა და ვიზიტის მაღალ დონეზე მომზადებისთვის ქართულ და ამერიკულ მხარეებს მადლობა გადაუხადა.

ამავე თემაზე: