საქართველოს პრემიერ-მინისტრმა გიორგი კვირიკაშვილმა აშშ-ს სახელმწიფო მდივანთან მაიკ პომპეოსთან შეხვედრის შემდეგ ერთობლივ პრესკონფერენციაზე განაცხადა, რომ აშშ-ის დახმარებით, საქართველო მსოფლიოში ინვესტირებისა და ბიზნესის წარმოებისთვის ერთ-ერთ ყველაზე ხელსაყრელ ქვეყანად იქცა.

გიორგი კვირიკაშვილის განცხადებით, საქართველომ დიდი გზა გამოიარა, რათა გამხდარიყო ამერიკის შეერთებული შტატების ღირსეული პარტნიორი და ძლიერი მოკავშირე.

პრემიერის თქმით, პრეზიდენტ ტრამპის ხელმძღვანელობით პარტნიორობა საქართველოსა და აშშ-ს შორის მნიშვნელოვნად გაძლიერდა.

"მომავალში ჩვენ ვხედავთ ჩვენი ურთიერთობების კიდევ უფრო განმტკიცების დიდ პოტენციალს ორივე ქვეყნის სტრატეგიული ინტერესების გათვალისწინებით და დღევანდელი სესია იძლევა შესანიშნავ შესაძლებლობას, არა მხოლოდ განვიხილოთ მიღწეული პროგრესი, არამედ დავსახოთ ჩვენი კავშირების გაღრმავების პრიორიტეტები", - განაცხადა გიორგი კვირიკაშვილმა.

მან სიტყვით გამოსვლისას განაცხადა, რომ აშშ-ის უწყვეტი მხარდაჭერის წყალობით საქართველოში განხორციელდა დემოკრატიის კონსოლიდაცია, გაძლიერდა სახელისუფლებო ინსტიტუტები და შეიქმნა მეტი შესაძლებლობა არა მხოლოდ საქართველოს, არამედ მთელი რეგიონის ეკონომიკური განვითარებისთვის.

"ჩვენ ვამაყობთ, რომ ვართ მსოფლიოს ლიდერი რეფორმატორი ქვეყნების სიაში და ამერიკის შეერთებულ შტატებსაც შეუძლია, იამაყოს ამ წარმატებაში შეტანილი წვლილით", - თქვა პრემიერმა.

გიორგი კვირიკაშვილმა პომპეოსთან შეხვედრის დროს ყურადღება გაამახვილა აშშ-ს მიერ საქართველოს ტერიტორიული მთლიანობისა და სუვერენიტეტის მხარდაჭერაზე.

"აშშ-ის მხარდაჭერას რუსეთის ფედერაციასთან კონფლიქტის მშვიდობიანი გზით მოგვარებისა საქართველოს ტერიტორიების - აფხაზეთისა და ცხინვალის რეგიონების დეოკუპაციის პროცესში უდიდესი მნიშვნელობა აქვს საქართველოსთვის და რეგიონში სტაბილურობისთვის", - განაცხადა კვირიკაშვილმა.

მისივე თქმით, აშშ-სა და საქართველოს აქვთ მთელს მსოფლიოში მშვიდობისა და სტაბილურობის შენარჩუნების საერთო მიზნები.

პრემიერი ავღანეთში საქართველოს სამშვიდობო მისიების საკითხსაც შეეხო. მისი განცხადებით,
თავდაცვის სფეროში ჩვენი ორმხრივი და მრავალმხრივი თანამშრომლობა დიდ დახმარებას უწევს საქართველოს შეიარაღებული ძალების მოდერნიზაციასა და თავდაცვისუნარიანობის განმტკიცებაში.

"ამ ეტაპზე ჩვენ უკვე მზად ვართ, მივაღწიოთ კიდევ უფრო შთამბეჭდავ პროგრესს უსაფრთხოების სფეროში ჩვენს ორმხრივ და მრავალმხრივ თანამშრომლობაში", - ამბობს პრემიერი.

მისი თქმით, საქართველომ ნატოსთან ურთიერთქმედების განმტკიცების მხრივ მნიშვნელოვან პროგრესს მიაღწია.

"ჩვენი სტატისტიკა უკვე აღემატება მთლიანი შიდა პროდუქტიდან თავდაცვის ბიუჯეტზე გამოყოფილი სახსრების ნატოს სტანდარტის - 2 პროცენტს, სამხედრო ტექნიკაზე გამოყოფილი 20 პროცენტის ჩათვლით. ჩვენ მოხარული ვართ, რომ გვეძლევა შესაძლებლობა, შევიძინოთ აშშ-ის სამხედრო თავდაცვითი აღჭურვილობა", - თქვა პრემიერმა.

მან ევროატლანტიკური ინტეგრაციის პროცესში აშშ-ს როლზეც ისაუბრა და იმედი გამოთქვა, რომ საქართველოს პროგრესი ბრიუსელის ნატოს სამიტზე ნატოს წევრობისკენ მიმავალ გზაზე აისახება.

"საქართველოს გაწევრიანება ნატოში კიდევ უფრო განამტკიცებს ევროატლანტიკურ უსაფრთხოებას", - განაცხადა პრემიერმა.

ამერიკის სახელმწიფო მდივანმა პრემიერ კვირიკაშვილთან შეხვედრისას ყურადღება ისეთ საკითხებზე გაამახვილა, როგორიცაა კანონის უზენაესობა საქართველოში, სასამართლოს დამოუკიდებლობა და დაცული პლურალიზმი

მაიკ პომპეომ საქართველოს ევრო-ატლანტიკურ მისწრაფებებზე და რუსულ ოკუპაციაზეც ისაუბრა. სახელმწიფო მდივნის თქმით, შეერთებული შტატები მოუთმენლად ელოდება დღეს, როდესაც საქართველო ჩრდილო ატლანტიკური ალიანსის სრულუფლებიანი წევრი გახდება.