კოალიცია დამოუკიდებელი და გამჭვირვალე მართლმსაჯულებისთვის აცხადებს, იუსტიციის უმაღლესი საბჭოს სხდომების დახურვის ინიციატივა ეწინააღმდეგება კანონსა და დემოკრატიული მართვის პრინციპებს.

საბჭოს მოსამართლე წევრმა, სერგო მეთოფიშვილმა სხდომების დახურვის ინიციატივა 26 მარტს გამოთქვა. კოალიციის განმარტებით, კანონის თანახმად, საბჭო ვალდებულია ღიად და საჯაროდ წარმართოს თავისი სხდომები.

"ამგვარი ინიციატივა მხოლოდ დამაზიანებელი შეიძლება იყოს საბჭოს საქმიანობის გამჭვირვალობის, საბჭოში განსხვავებული მოსაზრებების გამოთქმისა და სასამართლოს რეპუტაციისთვის", - ნათქვამია განცხადებაში.

განცხადების მიხედვით, იუსტიციის უმაღლესი საბჭო უნდა იყოს ანგარიშვალდებული საზოგადოების წინაშე.

კოალიციის განცხადებით, სასამართლო სისტემაში გავლენიანი ჯგუფების, საკანონმდებლო ხარვეზებისა და საბჭოში არსებული პრობლემების შესახებ საჯარო სხდომებზე დაკვირვების შედეგად გახდა ცნობილი.

"მოსამართლე სერგო მეთოფიშვილის ინიციატივა მხოლოდ საბჭოს საქმიანობაში არსებული სიღრმისეული პრობლემების და გამოწვევების შესახებ ინფორმაციის დამალვის და საბჭოში კრიტიკული აზრის ჩახშობის მიზანს შეიძლება მოემსახუროს".

მათივე განმარტებით, მსგავსი ინიციატივა საბჭოს მოსამართლე წევრისგან სასამართლო რეპუტაციასაც აზიანებს:

"მოსამართლე, რომელიც თავად უნდა იყოს სასამართლოში საჯარო განხილვის უფლების უმთავრესი დამცველი, საბჭოს სხდომების ღიად და საჯაროდ წარმართვის წინააღმდეგ გამოდის, რაც სერიოზულ ზიანს აყენებს სასამართლო ხელისუფლების ავტორიტეტს და მის მიმართ ნდობას".

ისინი მოუწოდებენ იუსტიციის საბჭოს, შეაფასოს ინიციატივის დამაზიანებელი ეფექტი.