პაველ დუროვმა, აპლიკაცია Telegram-ის დამფუძნებელმა და აღმასრულებელმა დირექტორმა, ფრანგულ ჟურნალ Le Point-თან ვრცელ ინტერვიუში განაცხადა, რომ მას 100-ზე მეტი შვილი ჰყავს, რომლებიც მის მულტიმილიარდიან მემკვიდრეობას გაიზიარებენ.

დუროვმა, რომელმაც ჟურნალს უამბო, რომ ცოტა ხნის წინ ანდერძი შეადგინა, აღნიშნა, რომ მისი ქონება შვილებს დარჩებათ, მაგრამ არა მომდევნო 30 წლის განმავლობაში. Bloomberg Billionaires Index-ის მიხედვით, მისი ქონება ამჟამად $13.9 მილიარდს შეადგენს.

"მინდა, რომ ჩვეულებრივი ადამიანებივით იცხოვრონ, თვითონ მიაღწიონ წარმატებას, ისწავლონ საკუთარ თავზე დაყრდნობა, უნდოდეთ შექმნა, და არა უბრალოდ საბანკო ანგარიშზე დამოკიდებულება," — განუცხადა მან გამოცემას.

40 წლის დუროვმა დაამატა, რომ მას ექვსი შვილი ჰყავს სამი სხვადასხვა პარტნიორისგან, ხოლო კიდევ 100-ზე მეტი — სპერმის დონაციის გზით.

"კლინიკამ, სადაც 15 წლის წინ მეგობრის დასახმარებლად სპერმის დონაცია დავიწყე, მითხრა, რომ ამ გზით 12 ქვეყანაში 100-ზე მეტი ბავშვი დაიბადა," — უთხრა მან Le Point-ს.

დუროვმა ხაზგასმით აღნიშნა, რომ მის ყველა შვილს "ერთი და იგივე უფლებები ექნება".

მისი ამჟამინდელი ქონების გათვალისწინებით, თუ დუროვს 106 შვილი ჰყავს, თითოეული მათგანი დაახლოებით 131 მილიონ დოლარს მიიღებს მემკვიდრეობით.

"არ მინდა, რომ ჩემს სიკვდილის შემდეგ ერთმანეთს გადაეკიდონ," — განაცხადა მან ინტერვიუში.