ქართველი მუსიკოსისა და მომღერლის, ირაკლი ჩარკვიანის ავტობიოგრაფიული რომანი გერმანული ენაზე გამოიცემა. "მშვიდ ცურვას" გამომცემლობა Dagyeli Verlag გამოსცემს. ამის შესახებ ინფორმაცია გამომცემლობის ფეისბუქ გვერდზე გავრცელდა.

"ოფიციალურად ვაცხადებთ: ირაკლი ჩარკვიანის რომანი ზაფხულის დასაწყისში გამოიცემა", - წერს გამომცემლობა.

Dagyeli Verlag-ის ფეისბუქ გვერდზე წიგნის ყდაც გამოჩნდა. "მშვიდი ცურვის" ქართული გამოცემისგან განსხვავებით, გერმანული თარგმანი წითელ ფერშია გადაწყვეტილი და მასზე ირაკლი ჩარკვიანის სხვადასხვა რაკურსში გადაღებული ფოტოა გამოსახული.

"მშვიდი ცურვა" ფრანკფურტის წიგნის საერთაშორისო ბაზრობის ფარგლებში, წიგნის ეროვნული ცენტრის მხარდაჭერით ითარგმნა. გერმანული თარგმანი იუნონა გურულს ეკუთვნის.

ირაკლი ჩარკვიანის ავტობიოგრაფიული რომანი პირველად 2006 წელს, გამომცემლობა ლოგოს-პრესმა გამოსცა. 2014 წელს "მშვიდმა ცურვამ" ქართულ ლიტერატურულ მარათონში "ჩემი წიგნი" გაიმარჯვა და ხმების რაოდენობით გადაასწრო ისეთ რომანებს, როგორიცაა "ჯაყოს ხიზნები", "სამოსელი პირველი" და სხვ.