კოალიცია ცვლილებისთვის ერთ-ერთი ლიდერი ელენე ხოშტარია რუსთავის ქალთა ციხიდან წერილს აქვეყნებს, სადაც ოპოზიციური პარტიების ალიზანსის შექმნას ეხმურება და აღნიშნავს, რომ რეჟიმთან ბრძოლაში კრიტიკული მომენტი დგება. მისივე განმარტებით, ოპოზიციის ერთობა პასუხისმგებლობის აღების ძალიან სერიოზული წინაპირობაა. ელენე ხოშტარია წერს იმასაც, რომ ბედნიერია, როცა ამ შეთანხმებას ხედავს და ოპოზიციის პასუხისმგებლობის მაღალ ხარისხს უყურებს, განსაკუთრებით ციხიდან.

"კრიტიკული მომენტი დგება რეჟიმთან ბრძოლაში. კრიტიკული მომენტი ინიციატივის აღების, პირველ რიგში, ჩვენი ხალხისთვის და აგრეთვე მთელი მსოფლიოსთვის იმის ჩვენების, რომ საქართველო ბიძინა არ არის. ეს არა კომენტარებით, არამედ საქმით უნდა ვანახოთ. პოლიტიკური კლასის ისტორიული ვალდებულებაა, ეს შევძლოთ. პროდასავლური პარტიების ერთობლივი მუშაობა ინიციატივისა და პასუხისმგებლობის აღების ძალიან სერიოზული წინაპირობაა. ბევრმა სხვა ოპოზიციამ ავტოკრატიულ ქვეყნებში ეს ვერ მოახერხა. ჩვენ დიდი ნაბიჯი გადავდგით წინ ამ შეთანხმებით. თუმცა, ჯერ სიხარული ადრეა და საქმით უნდა ვანახოთ შედეგი, მაგრამ გულწრფელად გეტყვით, ძალიან ბედნიერი ვარ, როცა ამ შეთანხმებას ვხედავ და ოპოზიციის პასუხისმგებლობის მაღალ ხარისხს ვუყურებ, განსაკუთრებით ციხიდან.

არ დავზოგავთ თავს შედეგისთვის!

ბოლომდე!", — წერს ელენე ხოშტარია.

შეგახსენებთ, გუშინ 2 მარტს 9 ოპოზიციური პარტია გამარჯვების საერთო სტრატეგიაზე და თანამშრომლობის წესებზე შეთანხმდა. ამ ალიანსში არ მოხვდნენ ლელო ძლიერი საქართველო და გახარია საქართველოსთვის.

ოპოზიციის ალიანსი მიზნად ისახავს ბიძინა ივანიშვილის ავტოკრატიული რეჟიმისგან საქართველოს გათავისუფლებას, ევრო-ატლანტიკური კურსის აღდგენას და ამ გზით, საქართველოს ეროვნული დამოუკიდებლობის და სახელმწიფოებრიობის გადარჩენას.

ალიანსის წევრი პარტიებია: ახალი, გირჩი — მეტი თავისუფლება, დროა, ევროპული საქართველო, ეროვნულ-დემოკრატიული პარტია, ერთიანი ნაციონალური მოძრაობა, თავისუფლების მოედანი, სტრატეგია აღმაშენებელი და ფედერალისტები.