საბერძნეთის უსაფრთხოების სამსახურის წარმომადგენელთა განცხადებით, კუნძულ კრეტაზე მდებარე სამხედრო-საზღვაო ბაზაზე სავარაუდო ჯაშუშური საქმიანობის გამო, დასაკითხად საქართველოს მოქალაქეა გადაყვანილი. აღნიშნული პირი საბერძნეთის ეროვნული დაზვერვის სამსახურის (EYP) მეთვალყურეობის ქვეშ იმყოფებოდა და იგი ათენის საერთაშორისო აეროპორტში ჩამოსვლისთანავე დააკავეს. ინფორმაციას ბერძნული მედია ავრცელებს.

გამომძიებლების თქმით, მოპოვებულია მტკიცებულებები, რომლებიც ჯაშუშობის ეჭვს ამყარებს, თუმცა აღმოჩენილი მასალების შესახებ დეტალები არ საჯაროვდება. უსაფრთხოების სამსახურის მაღალჩინოსნებმა ხაზი გაუსვეს ამ საქმის მსგავსებას 2025 წლის ზაფხულში მომხდარ შემთხვევასთან, როდესაც სუდას ბაზაზე თვალთვალის ბრალდებით აზერბაიჯანის 26 წლის მოქალაქე დააკავეს და პატიმრობაში დატოვეს.

დაახლოებით იმავე პერიოდში, კვიპროსის ხელისუფლებამ ქალაქ პაფოსში ასევე დააკავა აზერბაიჯანის მოქალაქე, რომელიც ლიმასოლსა და პაფოსში მდებარე სამხედრო ობიექტებს ფოტოებს უღებდა. აღნიშნული საქმის სასამართლო დოკუმენტებში საუბარია ირანის "ისლამური რევოლუციის გუშაგთა კორპუსთან" სავარაუდო კავშირზე. ბერძენი მაღალჩინოსნების ვარაუდით, ეს შემთხვევები შესაძლოა დაკავშირებული იყოს უფრო ფართო ქსელთან, რომელიც ირანის მითითებით მოქმედებს.