ჩეჩენი ბიზნესმენი, უმარ ჯაბრაილოვი, რომელიც ჯეფრი ეფსტინის პარტნიორ გიზლეინ მაქსველს თავის "მონათესავე სულს" უწოდებდა, მოსკოვის მდიდრულ აპარტამენტში გარდაცვლილი იპოვეს. მან თავი, სავარაუდოდ, მას შემდეგ მოიკლა, რაც მისი სახელი აშშ-ის იუსტიციის დეპარტამენტის მიერ ეფსტინის საქმეზე გამოქვეყნებულ უახლეს დოკუმენტებში აღმოჩნდა. ამის შესახებ ინფორმაციას New York Post ავრცელებს.

• ეფსტინის საქმის მასალებში ჩეჩენი ბიზნესმენი ფიგურირებს

ელექტრონული წერილები აჩვენებს, რომ იგი 2001 წელს მოსკოვში ჯეფრი ეფსტინის "მადამთან", გიზლეინ მაქსველთან შეხვედრას ცდილობდა. ცნობისათვის, მაქსველი ათწლეულების განმავლობაში ეფსტინის უახლოესი პარტნიორი იყო. გამოძიების თანახმად, ის იყო მთავარი ფიგურა ეფსტინის დანაშაულებრივ სქემაში — ეხმარებოდა ბიზნესმენს არასრულწლოვანი გოგონების მოძებნაში, გადაბირებასა და სექსუალური ექსპლუატაციისთვის მომზადებაში.

"ძვირფასო გიზლეინ, ლონდონიდან დავბრუნდი, ვგეგმავ მოსკოვში ყოფნას. ძალიან მინდა შენი ნახვა, მაგრამ ზუსტად უნდა ვიცოდე როდის ჩამოდიხარ, რადგან მინდა შენზე ვიზრუნო და დახვედრა დავაორგანიზო. საუკეთესო სურვილებით! უმარი," — ნათქვამია 2001 წლის 24 მაისით დათარიღებულ ელექტრონულ წერილში.

მაქსველმა მას მეორე დღესვე უპასუხა:

"უმარ, ვწუხვარ, რომ გასულ კვირას ვერ ჩამოვედით. გზიდან გადავუხვიეთ და საფრანგეთში აღმოვჩნდით. თუმცა, ჩვენ — მე, ჯეფრი და ტომი — მომავალ კვირას, პარასკევს ჩამოვალთ. იქ იქნები და შევძლებთ შეხვედრას? შემატყობინე. იმედია, კარგად ხარ"

მათი ურთიერთობის მასშტაბები ან ის, როგორ, რა ვითარებაში გაიცნეს ერთმანეთს, ჯერჯერობით უცნობია. თუმცა, როგორც სააგენტო East 2 West იტყობინება, მას შემდეგ რაც გიზლეინ მაქსველი ეფსტინისთვის არასრულწლოვანი გოგონების სექსუალურ ექსპლუატაციაში დახმარებისთვის დამნაშავედ ცნეს, ჯაბრაილოვი აცხადებდა, რომ მაქსველთან ახლო ურთიერთობა ჰქონდა.

"მე ვიცნობდი ეფსტინს. ის გიზლეინ მაქსველმა გამაცნო, რომელიც ჩემი მონათესავე სული იყო, მაგრამ ვერასდროს წარმოვიდგენდი, რომ ისინი პარტნიორები იყვნენ, რომ ის იმ გოგონების მოძებნაში იყო ჩართული, რომლებიც ახლა მთელ მედიაში არიან," — განაცხადა მან.

ჩეჩნეთში დაბადებული ჯაბრაილოვი ერთ დროს მოსკოვში სასტუმროს Radisson Slavyanskaya Hotel & Business Center-ს ფლობდა და სათავეში ედგა კომპანიას, რომელიც რუსულ სავაჭრო ცენტრებს ზედამხედველობდა.

ცოტა ხნის წინ ჯაბრაილოვის ეფსტინის ფაილებში გამოჩენაზე OC media-ც წერდა.

მათი ინფორმაციით, ჯაბრაილოვი 1958 წელს გროზნოში დაიბადა და რუსეთში ცნობილია, როგორც ბიზნესმენი და პოლიტიკური ფიგურა, ჩეჩნეთის ყოფილი წარმომადგენელი რუსეთის ფედერალური კრების ფედერაციის საბჭოში, ასევე ფილანთროპი და საზოგადო მოღვაწე. 2000 წელს ის რუსეთის პრეზიდენტობის კანდიდატი გახდა, მაგრამ ხმების მხოლოდ 0,1% მიიღო.

2017 წელს ჯაბრაილოვი დიდ სკანდალში გაეხვა, როდესაც მოსკოვის კრემლთან მდებარე Four Seasons-ის სასტუმროს ლუქს-ნომერში პისტოლეტით ცეცხლი უმისამართოდ გახსნა და კედლებსა და ჭერს ესროდა. სროლა, სავარაუდოდ, სასტუმროს მომსახურებით უკმაყოფილებამ გამოიწვია. ბიზნესმენმა ნომერში საკვები შეუკვეთა, თუმცა ის მიმტანის ნაცვლად დამლაგებელმა მოიტანა სპეციალური ეტლით, რამაც, გავრცელებული ინფორმაციით, მილიონერი გააღიზიანა. ამის შემდეგ, მან ჭერის მიმართულებით სროლა დაიწყო და ადმინისტრაციის გამოძახება მოითხოვა. ჯაბრაილოვს 500 000 რუბლი (დაახლოებით 6 300 დოლარის) ჯარიმა დაეკისრა.