მაგთიში ამბობენ, რომ ინტერნეტპაკეტების გაუქმების შესახებ მომხმარებლის ინფორმირება არა მათ, არამედ სახელმწიფო სტრუქტურებს ევალებოდათ. ამის შესახებ კომპანიის გავრცელებულ განცხადებაშია ნათქვამი.

"მაგთიკომი კონსოლიდირებული ტენდერის ფარგლებში ხელშეკრულებებს აფორმებს სახელმწიფო ორგანიზაციებთან და არა ინდივიდუალურად, ორგანიზაციაში დასაქმებულ თანამშრომლებთან. შესაბამისად, ხელშეკრულების პირობების გაცნობაზე/ინფორმირებაზე მაგთიკომი პასუხისმგებელი ვერ იქნება. სახელმწიფო ორგანიზაციებში დასაქმებულებს ნებისმიერ დროს აქვთ შესაძლებლობა, ხელშეკრულების პირობების გაცნობა მოსთხოვონ დამსაქმებელს ან თავად გაეცნონ საჯაროდ ატვირთულ დოკუმენტს."

მომხმარებელთა უფლებების დამცველი, თამთა ტეფნაძე აცხადებს, რომ მიუხედავად იმისა თუ რა სახელშეკრულებო პირობები ჰქონდა მაგთის, ის ვალდებული იყო მოხმარებლისთვის პაკეტების გაუქმების შესახებ გონივრულ ვადაში, 10 დღით ადრე ეცნობებინა.

"იყო ვალდებული ინფორმირებაზე, აუცილებლად. მაგთიკოს ზოგადად ევალება მოხმარებელთა, აბონენტთა ინფორმირების ეფექტიანი სისტემის დანერგვა, რაც გულისხმობს, რომ 10 დღით ადრე მომხმარებელს უნდა ცოდნოდა მოსალოდნელი ცვლილებების შესახებ."

მაგთი სახელმწიფო უწყების თანამშრომლებს 5 ლარად 15 GB-ს ნაცვლად 5 GB-ს მიყიდის. გაძვირებული ტარიფებით აბონენტები პირველი მარტიდან სარგებლობენ. სწორედ ამ დროიდან გახდა მაგთი ჯეოსელთან და ბილაინთან ერთად სახელმწიფო სატელეკომუნიკაციო მომსახურების კონსოლიდირებული ტენდერის გამარჯვებული.