მეცნიერება ბევრი ადამიანის აღქმაში სერიოზული სფეროა, რომლითაც სერიოზული ადამიანები ინტერესდებიან. თუმცა მეცნიერების საფუძველში პირველ რიგში ცნობისმოყვარეობა დევს, რაც იმას ნიშნავს, რომ მასში ბევრი რამაა სახალისო. მაგალითად, სამეცნიერო ექსპერიმენტები, რომლებიც ყველას უყვარს, განსაკუთრებით კი - ბავშვებს.

გთავაზობთ 7 სამეცნიერო ექსპერიმეტს, რომელთა ჩატარებაც სახლიდან გაუსვლელად, ყოველგვარი სერიოზული მომზადების გარეშე შეგიძლიათ.

ტორნადო

როგორ შევქმნათ ტორნადო? ამისთვის დაგვჭირდება ორი ბოთლი, პატარა მილი და წყალი.. საკმარისია, შევანჯღრიოთ ზედა ბოთლი, რომ სითხის გრიგალს დავინახავთ. ეს იმიტომ ხდება, რომ სითხე ამ დროს ზედა ბოთლიდან ქვემოთ ეშვება, ჰაერი კი პირიქით, ქვედა ბოთლიდან ზევით ადის - შედეგად წარმოიქმნება სპირალური ფორმის ტორნადო.

უფრო შთამბეჭდავი სანახაობისთვის ექსპერიმენტში შეგვიძლია გამოვიყენოთ საკვები საღებავით შეფერადებული სითხე.

ცისარტყელა

იმ შემთხვევაში, თუ ოთხი განსხვავებული (შეურევადი) ხსნარი გვექნება ოთხი განსხვავებული სიმკვრივით და მათ ერთ ჭურჭელში მოვათავსებთ, სითხეები თანმიმდევრულად განლაგდებიან სიმკვრივის მიხედვით. ნაკლებად მკვრივი ზემოთ მოექცევა, ხოლო უფრო მკვრივი კი - ქვევით გადაინაცვლებს.

შეგვიძლია სითხეებში შაქრის რაოდენობაც გავზარდოთ, ამით მათ სიმკვრივეს გავზრდით.

ტყლარწი

ავურიოთ ერთმანეთში წებო, წყალი, საკვები საღებავი, დავუმატოთ ცოტა ბორის მჟავა და ტყლარწიც მზადაა.

წებო შეიცავს პოლივინილის აცეტატს, რომელიც თხევადი პოლიმერია. ბორი უერთდება პოლივინილის აცეტატის მოლეკულებს, რომლებიც ერთობლივად ქმნიან დიდ მოქნილ პოლიმერს - ე.წ ტყლარწს.

მაკარონის რაკეტა

გინდ დაიჯერეთ გინდ არა, სახლის პირობებშიც შეგიძლიათ ააწყოთ საკუთარი მარტივი რაკეტის ძრავა. ამისთვის დაგჭირდებათ საფუარი, წყალბადის ზეჟანგი, ჭურჭელი, ცეცხლი და .... უმი მაკარონი.

წყალბადის ზეჟანგი საფუართან რეაქციაში შედის, შედეგად კი ჟანგბადი გამოიყოფა, რომელიც მაკარონის შიგნით გროვდება. პატარა ნაპერწკალი და რაკეტაც მზადაა.

მყისიერი ყინული

როგორც წესი, წყალი სავსეა ნაწილაკებით და მინარევებით, რომელთა გარშემოც ყალიბდება ყინული. თუმცა, აბსოლუტურად სუფთა წყალს ასეთი ნაწილაკები არ აქვს, რის გამოც, მას შეუძლია, გაყინვის გარეშე გაცივდეს დაბალ ტემპერატურაზე.

თუ სუფთა წყლით სავსე ბოთლს საყინულეში შეაგდებთ და 3 საათი გააჩერებთ, წყალი იმ ტემპერატურას მიაღწევს, რომელზეც, წესით, უნდა იყინებოდეს. ამის შემდეგ კი შეგიძლიათ წყალი ყინულზე დაასხათ და ის მომენტალურად გაიყინება.

ფერომაგნიტური სითხე

ეს ექსპერიმენტი საშუალებას მოგვცემს, მაგნიტური ველის მოქმედება ცხადად დავინახოთ. დაგვჭირდება რკინის ფხვნილი, ცოტა წყალი და ჭურჭელი.

თუ ძლიერ მაგნიტს მოვათავსებთ ჭურჭელთან ახლოს, რკინის ნამცეცები მას მწყობრად მოძრაობაში აჰყვებიან.

სოდის ვულკანი

საჭმელი სოდისა და ძმრის დახმარებით შეგიძლიათ ბობოქარი ვულკანი შექმნათ.

მათი რეაქციის შედეგად წარმოიქმნება ნახშირორჟანგის აირი, რაც ბოთლში წნევას ზრდის (რომელიც გიფზე ვულკანის შიგნითაა მოთავსებული), აირი ზემოთ ამოდის და "ლავა" ამოიფრქვევა.