ამერიკის ელჩი, იან კელი თავის გამოსამშვიდობებელ სიტყვაში კიდევ ერთხელ შეეხო საქართველოს საარჩევნო სისტემას. მისი თქმით, პრობლემად რჩება არათანაბარი საარჩევნო გარემო და ამომრჩეველთა დაშინებები:

"მმართველი პარტიის დომინანტური პოზიცია მთავრობის ყველა დონეზე ქმნის არათანაბარ დემოკრატიულ სამოქმედო არეალს. მიუხედავად იმისა, რომ ეუთო-ს დემოკრატიული ინსტიტუტებისა და ადამიანის უფლებების ოფისის დამკვირვებლების /OSCE/ODIHR/ შეფასებით 2017 წლის ადგილობრივი არჩევნების დროს დაცული იყო ფუნდამენტური თავისუფლებები და კანდიდატებს თავისუფლად შეეძლოთ კამპანიის განხორციელება, შეფასებაში ასევე აღინიშნა, რომ ზოგადი საარჩევნო გარემო ხასიათდებოდა მმართველი პარტიის დომინანტური მდგომარეობით, მათ შორის შეინიშნებოდა კანდიდატთა და ამომრჩევლთა დაშინების შემთხვევების ზრდა."

იან კელის მიაჩნია, რომ საარჩევნო გარემოს გამოსასწორებლად აუცილებელია ცენტრალური საარჩევნო კომისია დამოუკიდებელი ინსტიტუტი გახდეს:

"თავისუფალი და სამართლიანი არჩევნების ჩატარება, მოითხოვს ცენტრალური საარჩევნო კომისიის ფუნქციონირებას, როგორც სრულად დამოუკიდებელი და სანდო ინსტიტუტისა, რომელიც პოლიტიკაზე მაღლა დგას და მისთვის აპრიორი კანონის სულისკვეთება და კანონის სიტყვაა."

იან კელიმ ასევე აღნიშნა, რომ საქართველოს დემოკრატიული განვითარება დამოკიდებულია პლურალისტულ პოლიტიკურ გარემოზე, სადაც ყველა პარტიას აქვს კონკურენციის გაწევის თანაბარი შესაძლებლობები:

"კვალიფიციური პარტიებისათვის აუცილებელია უკეთესი ხელმისაწვდომობა კამპანიისათვის საჭირო ფინანსებზე და გაზრდილი საეთერო დრო, განსაკუთრებით, დამოუკიდებელი კანდიდატებისათვის. სისტემა, სადაც ერთი პარტია იღებს 90 პროცენტზე მეტ შეწირულობას საარჩევნო კამპანიის წარმოებისათვის, დგას ერთ-პარტიული ძალაუფლების მონოპოლიის რისკის წინაშე."

იან კელი 33-წლიან დიპლომატიურ კარიერას ასრულებს. ამის შესახებ მან დღეს, 22 თებერვალს გამართულ გამოსამშვიდობებელ შეხვედრაზე განაცხადა. იან კელი აშშ-ის ელჩი საქართველოში 2015 წელს გახდა.