სახელმწიფო ინსპექტორის ახალი სამსახურის შექმნას ნაციონალური მოძრაობისა და ევროპული საქართველოს წევრების მხრიდან უარყოფითი რეაქციები მოჰყვა.

სალომე სამადაშვილი მიიჩნევს, რომ ახალი სამსახურის შექმნა იქნება ახალი ბიუროკრატიული წარმონაქმნი, რომელსაც რეალური შედეგი არ მოჰყვება.

"ეს დარჩება უშინაარსო ახალ წარმონაქმნად, რომელიც საბიუჯეტო ხარჯებს გაზრდის", - აღნიშნა სამადაშვილმა რუსთავი 2-თან.

ოთო კახიძის განმარტებით, ინიციატივა "მოვალეობის მიზნით რაღაცის შექმნას" უკავშირდება. მისთვის გაუგებარია, რომ უწყება მხოლოდ ზოგიერთი კატეგორიის დანაშაულს (წამება, წამების მუქარა, არაადამიანური ან დამამცირებელი მოპყრობა) გამოიძიებს.

მთავრობის დღევანდელ სხდომაზე, პრემიერ-მინისტრმა გიორგი კვირიკაშვილმა განაცხადა, რომ სამართალდამცველთა მიერ ჩადენილი შესაძლო დანაშაულის, არასათანადო მოპყრობისა და გადაცდომების გამოსაძიებლად სახელმწიფო ინსპექტორის სამსახური შეიქმნება. მისი თქმით, აღნიშნული ვალდებულება ევროკავშირთან ასოცირების ხელშეკრულებით არის გათვალისწინებული.

პრემიერ-მინისტრის თქმით, სახელმწიფო ინსპექტორის სამსახური უახლოეს მომავალში შეიქმნება.